Ilustrasaun pagamentu impostu via eletróniku. Imajen/Espesiál

DILI, 04 marsu 2021 (TATOLI)–Ministériu Finansa (MF) hamutuk ho Banku Sentrál Timor-Leste (BCTL, sigla portugés) sei halo lansamentu ba pagamentu impostu liuhosi mákina Automated Teller Machine (ATM) P24 no asinatura protokolu kooperasaun entre parte tolu.

Tuir ajenda, seremónia sei realiza sesta (05/03), hahú tuku 14:30 to’o 16:00, iha salaun MF.

“Lansamentu ne’e tuir kedan ho demonstrasaun reál prosesu pagamentu impostu hosi kontribuinte nomeadu no mós asinatura protokolu entre Autoridade Tributária (AT), Autoridade Aduaneira (AA)/Alfándega no Unidade Informasaun Finanseira (UIF),” refere nota imprensa ne’ebé Agência TATOLI asesu kinta ne’e.

UIF mak hanesan instituisaun Estadu ho kompeténsia atu kontrola ka asesu ba informasaun finanseira hodi prevene no kombate krime brankeamentu kapitál no finansiamentu terrorizmu.

Eventu ne’e sei hetan partisipasaun hosi reprezentante liña ministériu relevante, banku komersiál, setór privadu, kontribuinte no dirijente relevante sira hosi MF no BCTL.

Lansamentu plataforma pagamentu impostu liuhosi mákina ATM P24 (e-payment) hanesan mekanizmu di’ak ida atu fasilita kontribuinte sira bele prenxe sira-nia obrigasaun fiskál liuhosi plataforma online.

“Ho nune’e, kontribuinte-sira la presiza ba forma ona iha banku komersiál sira nia oin no bele iha tempu barak liu ba atividade negósiu ka programa, hamenus kustu tranzasaun no bele halo tranzasaun liuhosi fatin ne’ebé de’it bainhira iha asesu ba mákina ATM P24,” nota ne’e esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here