Timoroan ne'ebé fila hosi Indonézia ho Australia kumpre ona kuarentena obrigatoriu iha Tibar ho INAP durante loron 14 nia-laran. Imajen/Antonio Goncalves

DILI, 04 marsu 2021 (TATOLI)—Diretora Jerál Komisaun Nasionál Direitu Labarik (KNDL), Teresa Maria Freitas, hateten KNDL ho Fundu Nasoins Unidas ba labarik (UNICEF, sigla inglés) halo ona peskiza online no ninia rezultadu hatudu adoloxente pursentu 80 iha Timor-Leste sente COVID-19 muda sira-nia moris.

“Ita mós simu sujestaun saida mak sira iha ba sira-nia futuru”, Diretora Jerál KNDL ba jornalista sira iha sala leitura Xanana, Lecidere, kinta ne’e.

Tuir nia, respondente 400-resin họ idade entre tinan 10 no 24 mak hatán ba peskiza ne’e, sira maihosi munisípiu 12 inklui Rejiaun Administrativu Espesiál Oé-Cusse Ambeno ho pursentu 51 hosi Dill. Respondente sira-ne’e feto hamutuk pursentu 55, ema ho defisiénsia pursentu 7.

“Peskiza online kompleta ho entervista liuhosi telemóvel, maibé respondente balun hetan asesu limitadu ba internet. Barak mak kuran asesu ba edukasaun, tanba pandemia COVID-19 sai mudansa boot ba sira-nia moris,” nia hateten.

Nia hatutan, pandemia COVID-19 mak; ema bele fase liman beibeik ho sabaun, halo limpeza, interasaun sosiál, maibé iha mós rendimentu kuran, más tempu barak ho família no amigu sira.

Entretantu, Komisária KNDL, Dinorah Granadeiro, hateten objetivu hosi peskiza online ne’e rona no simu ideia hosi respondente nian kona-ba pandemia COVID-19 iha Timor-Leste.

“rona sira-nia ideia no garante ba prosesu hatán no rekuperasaun ne’e,” Dinorah Granadeiro hateten.

Nia haktuir, peskiza ne’e mós atu hatudu dezempeñu ativu hosi adoloxente barak hodi hatán ba pandemia CIVID-19 ne’e.

Hosi pursentu 45, tuir nia, respondente sira iha peskiza ne’e dehan sira halo asaun ajuda ba komunidade durante krize pandemia ne’e inklui halo diseminasaun informasaun.

Respondente sira sente influénsia ona sira-nia família hodi uza subsídiu $200 ne’e gasta barak liu ba nesesidade sira hanesan ‘aihan no bebida la’ós alkol sira.

Tuir reprezentante UNICEF iha Timor-Leste, Scott Whoolery, foinsa’e sira-nia nesesidade hetan konsiderasaun natoon hosi ema sira-ne’ebé mak foti desizaun.

Nia hateten, respondente pursentu 40 ne’e hakarak atu ema sira-ne’ebé mak foti desizaun foka liu ba labarik no foinsa’e sira liuliu kona-ba labarik sira-nian edukasaun no kriasaun empregu ba foinsa’e sira. 

“Labarik ida-idak iha direitu atu espresa livremente sira-nia vizaun no hola parte iha foti desizaun mak afeta sira-nia moris”, afirma.

Nia akresenta adoloxente no foinsa’e mak reprezenta baluk tolu (1/3) hosi populasaun Timor-Leste involve signifikamente no partisipa iha dezenvolvimentu no implementasaun polítika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here