Prezidente Konsellu Administrasaun IGE,I.P, Ermenegilda da Costa Laurentina. Imajen/IGE

DILI, 04 marsu 2021 (TATOLI)-Institutu Jestaun Ekipamentu, Insitutu Públiku (IGE.I.P, sigla portugés) fó prioridade halo intervensaun ba kazu emerjénsia sira kauza hosi dezastre naturál, ne’ebé fó ameasa ba movimentasaun komunidade.

Prezidente Konsellu Administrasaun IGE,I.P, Ermenegilda da Costa Laurentina, hateten atividade ne’ebé durante ne’e institutu halo iha situasaun emerjénsia no normál mak hanesan loke estrada foun, aterru estrada, ponte, normaliza mota no suru sai rai ne’ebé taka estrada sira.

“Ami-nia serbisu hamutuk ho komunidade atu loke estrada foun, aterru estrada no atende estrada kotu, inklui normaliza mota. Ami fó apoiu ba entidade hotu,” Prezidente IGE informa ba Agência TATOLI, iha ninia knaar fatin, Caicoli, Dili, kinta ne’e.

Notísia relevante: IGE hahú hasai sedimentasaun iha mota sira riksu ba inundasaun

IGE normaliza ponte estragu liga Natarbora-Dilor impaktu husi udan

Intervensaun intitutu públiku ne’e bazeia ba pedidu hosi  autoridade munisípiu, postu administrativu no suku to’o aldeia sira iha munisípiu 12, la Inklui Rejiaun Administrativu Espesiál Oé-cusse Ambeno (RAEOA).

Hafoin simu pedidu, parte IGE hala’o kedan preperasaun enjeñeria atu halo estudu ba fatin indikadu atu foti dadus, hafoin aprezenta relatóriu, hodi lori mákina ba terrenu hodi halo serbisu.

Nia dehan, daudaun IGE rejista ona pedidu hosi autoridade munisípiu 12 no kontinua fó prioridade hotu, maibé sei konsentra dahuluk ba kazu emerjénsia hosi dezastre naturál.

“Ita-nia komunidade sira balun ladún satisfás, katak IGE to’o agora seidauk bele halo intervensaun iha sira-nia fatin, maibé tenke fó prioridade urjénsia ba kazu dezastre naturál,” nia akresenta.

Nune’e, nia rekoñese pedidu balun hosi munisípiu hanesan loke estrada no aterru seidauk realiza tanba iha pedidu barak no kazu barak ne’ebé komunidade aprezenta relasiona ho tempu udan to’o bee sa’e estraga infraestrutura públika.

“Husu pasiénsia, tanba ami sei to’o iha fatin, enkuatu situasaun sira ne’e la’o normál ona no ami-nia mákina mós barak mak agora ho kondisaun avaria no halo hela manutesaun,” Prezidente IGE katak.

Hafoin hetan pedidu hosi munisípiu 12, IGE kria ona ekipa destakadu ba munisípiu Baucau no Viqueque, ne’ebé serbisu iha Baguia no Caibada, enkuantu iha munisípiu Lautém iha mota Daudere no eskola ida-ne’ebé rai taka iha munisípiu Covalima.

“Mákina sira konsetra maibé tanba daudaun iha serka sanitária hela iha Covalima maka ekipa seidauk bá terrenu,” nia hatutan.

Enkuantu, iha munisípiu, Manatuto,  Maliana, Ermera, Liquiçá, Bobonaro no Dili, ekipa IGE kontinua halo serbisu ho baze ba pedidu sira hanesan intervensaun ba dalan kotu, bee sa’e, rai monu, estrada kotu, aterru estrada no loke estrada foun inklui normaliza mota sira atu labele fó risku ba komunidade nia vida.

“RAEOA mak uluk ami fó kedan ekipa brigada destakadu iha ne’ebá no IGE la jere ona, Agora Autoridade mak bele jere, ami atende ba munisípiu 12 de’it,” nia tenik.

IGE hanesan instituisaun ida atu garante utilizasaun efisiente ba mákina pezada, ekipamentu no veíkulu pezadu.

Governu deside kria IGE iha 2005 hanesan institutu públiku ho autonomia administrativa, finanseira no patrimóniu própriu ne’ebé responsável ba boa jestaun no esplorasaun ba bens iha ámbitu prosekusaun dezenvolvimentu infraestrutura no nesesidade ba servisu administrasaun públika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here