Enkontru SEFOPE no Embaixada Korea Sul iha Timor-Leste, iha edifísiu Caicoli. Imajen/Mídia SEFOPE

DILI, 04 marsu 2021 (TATOLI)–Embaixadór Korea Súl iha Timor-Leste, Kim Jeong-Ho, informa durante ne’e Governu Korea akompaña nafatin atividade traballadór hosi rai-li’ur no rejista traballadór timor-oan hamutuk 400 maka ninia kontratu serbisu ramata ona maibé kontinua serbisu.

“Tuir ami-nia dadus iha ema na’in-400 maka daudaun serbisu iha Korea Súl,” Diplomata koreanu ne’e informa, hafoin enkontru ho ekipa Sekretaria Estadu Formasaun Profisionál no Empregu (SEFOPE), iha edifísiu Caicoli,  kinta ne’e.

Ba kestaun ne’e, Governu Korea iha programa repatriasaun voluntáriu maibé to’o agora seidauk bele realiza tanba daudaun aviaun laiha.

“Ami ko’alia ho SEFOPE atu haree filafali kestaun ne’e, nune’e ita-nia traballadór sira bele repatria voluntáriu,” nia akresenta.

Tuir Embaixadór, kondisaun hirak ne’e bele fó impaktu ba sistema kuota ne’ebé parte Governu Korea fó ba Governu Timor-Leste.

Kuota ne’ebé Timor-Leste hetan hosi programa haruka traballadór serbisu iha Korea kada tinan hamutuk 2.000, maibé iha períodu COVID-19 labele atinje meta ne’e.

Iha sorin seluk, Sekretáriu Estadu Formasaun Profisionál no Empregu, Alarico do Rosário, rekoñese kuadu traballadór barak maka serbisu ilegál iha Korea Súl, bele fó impaktu ba kuota, tanba ne’e nia husu traballadór sira atu hakbesik-an ba reprezentante Timor-Leste iha Korea Súl atu buka informasaun.

“Husu ba traballadór timor-oan ne’ebé daudaun serbisu ilegál, vontariamente hakbesik-an ba iha Embaixada Timor-Leste atu rejista-an, tanba se lae bele fó impaktu ladún di’ak ba imi-nia pesoál tanba ema bele deporta no labele hetan oportunidade serbisu tan iha Korea,” nia fó hanoin.

Bazeia ba dadus hosi SEFOPE, traballadór timor-oan ne’ebé serbisu iha Korea Súl hahú hosi tinan 2009 to’o 2020 hamutuk 3.696 no serbisu iha área peska, fábrika, no agrikultura.

Totál traballadór mane ne’ebé serbisu iha área peska hamutuk 2.193 no feto ne’ebé maka serbisu iha área peska hahú 2009 to’o 2020 laiha.

Traballadór timor-oan iha Korea Súl ne’ebé ramata ona kontratu iha tinan 2021 ne’e hamutuk na’in-86 no posibilidade sei aumenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here