Foos husi nasaun Vietname atraka iha Portu Dili, tersa (28/04). Imajen TATOLI/Antónia Gusmão

DILI, 04 marsu 2021 (TATOLI)—Ministériu Koordenadór Asuntu Ekonómiku (MKAE) hasai diploma ministeriál hodi Sentru Lojístika Nasionál (CLN, sigla portugés) halo intervensaun merkadu normaliza folin foos iha rejiaun-tolu, relasiona ho serka sanitária ne’ebé antes ne’e Governu aplika.

“Ministru Koordenadór Asuntu Ekonómiku hasai diploma ministeriál urjente, fó prioridade ba munisípiu Covalima no Bobonaro inklui Rejiaun Administrativa Espesiál Oé-cusse Ambeno (RAEOA) hodi halo intervesaun merkadu. Tanba ne’e, ami halo intervensaun merkadu hodi normaliza folin ne’ebé hahú sa’e iha fatin izoladu sira, ne’ebé impaktu hosi aplika serka sanitéria,” Prezidente CLN, Agosto Junior Trindade, informa ba Agência TATOLI, via telefónika, kinta ne’e.

Notísia relevante: Foos folin iha Fatumea sa’e ba $16.00 to’o $17.00

CLN rasik nota katak rejiaun-tolu ne’ebé aplika serka sanitária, daudaun folin foos sa’e  $17 to’o $18, enkuantu presu normál hosi $12 to’o $14.

Nia dehan, atu normaliza presu, CLN halo intervensaun merkadu indireta liuhosi kontrata kompañia lokál hodi halo intervesaun ba fatin tolu ne’ebé afetadu serka sanitária.

“Kompañia sira-ne’ebé tula sai foos iha armazén CLN nian, sira ba fa’an ho folin labele liu $12,50 hodi normaliza hikas folin foos iha fatin refere,” nia akresenta.

Totál foos ne’ebé maka parte CLN hasai hodi halo intervensaun merkadu ba munisípiu Bobonaro hamutuk tonelada 1.000, Covalima tonelada 1.000 no RAEOA tonelada 3.000.

“Tanba RAEOA hanesan rai ketan no iha difikuldade bainhira atu transporta, entaun Ministru Koordenadór Asuntu Ekonómika hatún despaisu apoia tonelada 3.000 ba rejiaun ne’e. Tanba ne’e sira hahú tula ona iha sesta semana kotuk saka 5.000 no restu sei tula tan,” Prezidente CLN hatutan.

Antes ne’e, CLN halo ona intervensaun umanitária dahuluk, ho koordenasaun Ministériu Solidaridade Sosiál no Inkluzaun (MSSI), konsege transporta foos saka 400 ba abitante aldeia tolu hanesan Klauhalek, Fatumean, no Mane-ki’ik iha postu administrativu Fatumean, munisípiu Covalima, nune’e mós halo distribuisaun ba zona izoladu iha munisípiu Bobonaro no RAEOA.

Foos ne’ebé iha armazén nasionál sufisiente tanba iha jullu 2020 Governu importa tonelada 30.000 resin hosi Vietname, ne’ebé la inklui foos importadu hosi setór privadu.

Iha loron 15 fevereiru, liuhosi reuniaun Konsellu Ministru deside halo serka sanitária iha munisípiu Covalima no Bobonaro, hahú loron tuir mai hafoin desizaun ne’e sai (16/02) to’o 23:59 loron 03 marsu 2021.

Iha loron 02 marsu, Governu hapara serka sanitária iha munisípiu Bobonaro tanba tuir relatóriu hosi Ministériu Saúde (MS) katak munisípiu ne’e la rejista kazu transmisaun lokál, maibé nafatin aplika serka sanitária iha munisípiu Covalima ho kondisaun fó fleksibilidade ba transportasaun sasán hanesan ai-han, nesesidade bázika no medikamentu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here