Hospitál Nasionál Guido Valadares (HNGV). Imajen Tatoli/Egas Cristóvão.

DILI, 04 marsu 2021 (TATOLI)—Ana Isabela Hermínia nu’udár alin-rasik hosi matebian ho inisiál MFF, husu ba autoridade justisa atu prosesa autór DPP ho sériu tuir dalan legál, tanba konsidera matebian sai vítima dala-rua.

“Ha’u husu ba parte justisa atu haree kazu ne’e ho sériu tanba ha’u-nia bin sai vítima dala-rua. Primeiru, autór halo violasaun ba nia oan no tuir-fali ha’u-nia bin tenke mate,”  Ana Isabela Hermínia ko’alia ba jornalista-sira ho tanis iha mortuáriu Hospitál Nasionál Guido Valadares (HNGV), kinta ne’e.

Nia konta tuir kronolojia katak, matebian MFF ho idade 38 hetan ta’a no sona to’o mate hosi nia kaben rasik DPP iha aldeia Budin, suku Batugade, Postu Administrativu Balibo, Múnisipiu Bobonaro iha kuarta 3 marsu.

“Iha 5 dezembru 2020, matebian kaer toman autór halo violasaun seksuál hasoru nia-oan rasik ho inisiál PYS idade 15 iha kuartu-laran, maibé matebian nonok de’it, tanba hetan ameasa hosi autór,” Ana Isabela Hermínia haktuir.

Nia hatutan, matebian hato’o duni keixa ba polísia iha 22 dezembru no polísia konsege kaer autór iha 28 dezembru no detein iha sela, enkuantu vítima ho nia oan feto ba hela iha Uma Mahon.

Durante periúdu hein prosesu, kada semana matebian ba presta deklarasaun iha Ministériu Públiku (MP) maibé autór sempre hein iha dalan hodi ameasa matebian no baku.

Iha fatin hanesan Prezidente Grupo Mulher Parlamentár Timor-Leste (GMPTL), Deputada Lídia Norberta konsidera autór komete kazu rua mak hanesan, kazu abuzu seksuál hasoru oan rasik no kazu omisídiu ba nia kaben rasik.

“Autór komete kazu insestu iha dezembru tinan kotuk no hetan tiha Termu Intidade Rezidénsia, horisehik nia halo tan krime omisídiu,” deputada Lídia Norberta subliña.

Nia husu ba autoridade judisiál atu labele husik de’it kazu ne’e, maibé tenki investiga ho lalais, tanba tuir informasaun ne’ebé GMPTL hetan katak, prosesu ne’e demora liu no ikus-mai prezudika vítima to’o lakon vida.

Entretantu, Xefe Departamentu Mortuáriu HNGV, Filomena Gomes informa sei hein órden hosi parte justisa hodi bele halo autópsia ba mate isin MFF.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here