Enkontru SEFOPE no Embaixada Korea Sul iha Timor-Leste, iha edifísiu Caicoli. Imajen/Mídia SEFOPE

DILI, 04 marsu 2021 (TATOLI)—Sekretáriu Estadu Formasaun Profisionál no Empregu (SEFOPE), Alarico do Rosário, konvoka enkontru ho Embaixadór Korea Súl iha Timor-Leste, Kim Jeong-Ho, hodi haree kondisaun transporta traballadór timor-oan ne’ebé iha ona kontratu ho kompañia, tanba situasaun COVID-19 difikulta movimentu aviaun.

Tuir Embaixadór, kondisaun ne’e la’ós de’it akontese ba traballadór hosi Timor-Leste maibé iha nasaun 15 seluk.

“Ami deskute asuntu rua importante kona-ba traballadór hamutuk 400 ne’ebé hetan ona kotratu foun atu arranka no traballadór sira ne’ebé antes ne’e serbisu ona iha ne’ebá hamutuk 49, maibé tanba sira pasa férias ho família iha Timór, agora seidauk konsege fila ba Korea tanba COVID-19, enkuantu kompañia sira kontaktu ona hodi sira bá fali Korea,” Diplomata koreanu ne’e dehan ba jornalista sira, hafoin enkontru iha edifífiu SEFOPE, Caicoli, kinta ne’e.

Iha fatin hanesan, Sekretariu Estadu  Alarico do Rosário, rekoñese prosesu ne’e la’o kleur tanba hetan difikuldade iha transporte, tanba ne’e parte rua tenta buka rezolve.

“Parte rua hanoin la hanesan, Korea nia hakarak aviaun ida-ne’ebé lori traballadór sira tenke aviaun regulár, maibé Timor-Leste iha situasaun pandemia tanba ne’e laiha aviaun regulár ida,” nia dehan.

Tanba ne’e, parte SEFOPE ho Governu Korea liuhosi nian Embaixadór deskute hodi ko’alia kona-ba kestaun ne’e.

“Sira foin simu traballadór foun hosi nasaun Kamboja, Timor-Leste sei laiha problema tanba COVID-19 la afeta maka’as, maibé difikuldade agora iha transporte, enkuantu , Governu Korea seidauk bele simu Indonézia no nasaun sira seluk tama bá sira-nia rai tanba kondisaun COVID-19,” nia akresenta.

Bazeia ba dadus hosi SEFOPE, traballadór timor-oan ne’ebé serbisu iha Korea Súl hahú hosi tinan 2009 to’o 2020 hamutuk 3.696 no serbisu iha área peska, fábrika, no agrikultura.

Totál traballadór mane ne’ebé serbisu iha área peska hamutuk 2.193 no feto ne’ebé maka serbisu iha área peska hahú 2009 to’o 2020 laiha.

Traballadór mane ne’ebé serbisu iha área fábrika hamutuk 1.317 no feto ne’ebé maka serbisu iha área fábrika hamutuk 62.

Traballadór mane sira ne’ebé maka serbisu iha área agrikultura hamutuk 51 no traballadór feto sira ne’ebé serbisu iha área agrikultura hamutuk 73.

Traballadór timor-oan iha Korea Súl ne’ebé ramata ona kontratu iha tinan 2021 ne’e hamutuk na’in-86 no posibilidade sei aumenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here