Koordenadór Forsa Tarefa ba Prevensaun no Mitigasaun Surtu COVID-19, Rui Maria deAraújo. Imajen TATOLI/Domingos Piedade Freitas.

DILI, 04 marsu 2021 (TATOLI)–Ekipa Forsa Tarefa hosi Centro Integrado da Gestão de Crise (CIGC) ho Koordenadór Regulár Ministériu Saúde no interligasaun ho COVID-19 prepara ona estratéjia balun iha Estadu Emerjénsia ba dasanulu-resin-ida (XI) ne’ebé hahú hosi 03 marsu to’o 02 abril iha territóriu Timor-Leste.

Koordenadór Forsa Tarefa ba Prevensaun no Mitigasaun Surtu COVID-19, Rui Maria deAraújo, hateten estratéjia prinsipál sira mak hanesan sei buka tuir ema ne’ebé mak halo kontaktu pesoál ho kazu pozitivu sira, implementa nafatin medida prevensaun no individuál, toma atensaun pontu entrada no fatin sira-ne’ebé mak risku ba transmisaun lokál, kondisaun kuarentena no selu-seluk tan.

“Hau hanoin haree ba evolusaun situasaun terrenu iha Munisípiu Covalima no Bobonaro, iha semana oin mai, ekipa sei buka tuir ema hirak ne’ebé mak kontaktu besik hosi kazu sira-ne’ebé mak iha,” Rui Maria de Araujo hateten hafoin ramata enkontru iha CIGC, Centro Convenção Dili, Merkadu Lama, Dili, kinta ne’e.

Ekipa Forsa Tarefa hosi Centro Integrado da Gestão de Crise (CIGC) ho Koordenadór Regulár Ministériu Saúde no interligasaun ho COVID-19 prepara ona estratéjia liuhsi enkontru. Imajen TATOLI/Domingos Piedade Freitas.

Nia hatutan, Munisípiu Bobonaro termina ona ninia serka sanitária maibe CIGC kontinua toma atensaun liuhosi medida prevensaun hanesan check temperature no medida protesaun individuál hanesan uza máskara, fase liman no selu-seluk tan.

Maske nunee, ekipa saúde kontinua halo screeaning iha área sira potensialmente hatudu risku boot iha zona fronteira nian.

Koodenadór ne’e mós salienta liu tan katak, CIGC sei haree fila-fali kondisaun lojistika kuarentena sira iha rai laran, nune’e bainhira kazu foun aumenta karik responde lalais afetadu sira iha kuarentena sira-ne’e.

“Objetivu tátiku operasionál ba periodu fulan ida ba oin ne’e mak ita tenke prevene ka kontein, transmisaun lokál ruma ne’ebé mosu,” nia dehan.

Kona ba progressu COVID-19 iha Munisípiu Covalima, durante loron ha’at ona la rejista kazu foun no hein katak sei laiha ta kazu foun.

“Ita sei halo esforsu hotu atu bele prevene labele iha transmisaun lokál. Karik iha transmisaun komunitária ita buka kontein ka labele permite transmisaun ne’e sai hosi fatin ne’ebé hanesan ita halo daudaun iha Munisípiu Covalima,” nia hateten.

Jornalista: Domingos Piedade Freitas

Editor: Cancio Ximenes

HAKEREK NO HATÁN

Please enter your comment!
Please enter your name here