DILI, 04 marsu 2021 (TATOLI)—Durante implementasaun despaisu konjunta regulariza kontentór, parte Autoridade Portuáriu Timor-Leste (APORTIL) la aplika demurrage (sansaun administrativa) ba importadór sira.
Tuir despaisu konjunta ne’ebé asina no fó sai hosi Ministériu Transporte no Komunikasaun no Ministru Interiór, inklui entidade relevante, oras ne’ebé kontentór labele sirkula maka hahú tuku 7:00-9:00 dadeer, tuku 12:00-14:00 lorokraik no tuku 17:00-21:00 kalan.
“Durante implemetasaun despaisu konjunta nia demurrage kuaze laiha, sei la selu buat ida ba portu,” Prezidente Konsellu Administrasaun, Flávio Cardoso, informa foin lalais ne’e ba Agência TATOLI, iha ninia knaar fatin, Portu Dili.
Maski nune’e iha funsionáriu APORTIL balun maka preokupa tanba bainhira kompañia la selu, sei implika ba reseita doméstika.
“Ha’u dehan lae, tanba demurrage hanesan multa ida ne’ebé maka selu, karik tarde iha prosesu dokumentu ruma no sasán nafatin iha portu to’o administrativamente kompleta maka sasán sai,” nia akresenta.
Nia konsidera, bainhira sasán sai tuir tempu normál di’ak tanba la prejudika kompañia no sei la hamosu hasa’e presu sasán iha merkadu.
“Enkuantu buat sasán sai sedu bele fasilita, ha’u fiar presu iha merkadu ne’e di’ak nafatin bainhira sasán ne’e livre hosi multa,” nia hatutan.
Nia fó ezemplu, bainhira ró ida lori kontentór ho 20 fit no kona demorage, ba kada loron aplika multa $25.
“Bainhira nia mai ho kontentór 40 fit ne’e kona $60, kuandu kompañia balun nia kontentór hosi 50 no 60 ba loron-neen to’o hitu, demurrage sei aumenta ba bebeik,” Flávio Cardoso tenik.
Jornalista: Natalino Costa
Editora: Julia Chatarina
