Diretór Jerál Estatístika, Élias dos Santos Ferreira, Reprezentante Rezidente UNDP, Munkhtuya Altaangerel, asina entendimentum iha salaun konferénsia DGE, Caicoli, kinta (04/03). Imajen TATOLI/Egas Cristóvão

DILI, 04 marsu 2021 (TATOLI)--Diresaun Jerál Estatístika (DGE, sigla portugés) Ministériu Finansa (MF) no United Nations Development Programme (UNDP) asina entendimentu ba peskiza impaktu sosiu-ekonómiku iha munisípiu 12 inklui Rejiaun Administrativa Espesiál Oé-cusse Ambeno (RAEOA) iha ámbitu COVID-19, ne’ebé peskiza sei hala’o ho durasaun fulan-rua hahú hosi loron 15 abríl to’o juñu tinan ne’e.

“Ami ho UNDP asina nota entedimentu hodi fó apoiu finaseiru, ba atidade entrevista sira, nune’e bele habelar  peskiza sosiu-ekonómiku no programa Cesta Bázika iha munisípiu 12 inklui RAEOA iha situasaun COVID-19,”  Diretór Jerál Estatístika, Élias dos Santos,  informa hafoin asina akordu ho Reprezentante UNDP iha edifísiu DGE iha Caicoli, Dili, kinta ne’e.

Diretór Jerál Estatístika, Élias dos Santos Ferreira, Reprezentante Rezidente UNDP, Munkhtuya Altaangerel, asina entendimentum iha salaun konferénsia DGE, Caicoli, kinta (04/03). Imajen TATOLI/Egas Cristóvão

Iha tinan kotuk, halo ona peskiza ba munísipiu lima ho amostra uma-kain 417-resin, maibé Governu husu atubele habelar tan peskiza, nune’e DGE no UNDP tuur hamutuk hodi halo peskiza no foti amostra uma-kain 5.000 iha munisípiu 12 inklui RAEOA.

Munisípiu ne’ebé ho totál populasaun barak hanesan Dili, Baucau, Bobonaro no Ermera foti amostra purvolta 500, maibé ba munisípiu seluk foti de’it 300-resin.

Diretór Jerál Estatístika, Élias dos Santos Ferreira. Imajen TATOLI/Egas Cristóvão

“Ita sei halo selesaun ba entrevistadór sira iha sensu agríkola na’in-3.000 hodi foti de’it 70 no supervizór na’in-18 mak sei halo serbisu iha munisípiu 12 inklui RAEOA. Kada munsípiu sei destaka entrevistadór na’in-hitu, enkuantu Dili mak na’in-11 tanba totál populasaun barak liu,” nia akresenta.

Sei iha formasaun ba entrevistadór

DGE no UNDP sei hala’o formasaun ba entrevistadór sira iha loron 04 abríl, molok tama atividade.

Diretór Jerál ne’e hatutan, hafoin formasaun sei informa ba administradór munisípiu no xefe suku sira ne’ebé nia área tama amostra, atu hatene benefísiu ba peskiza ne’e no bainhira dadus ne’e sai, Governu bele uza hadi’a di’ak liután bem estar povu.

Kona-ba pergunta sira, sei liga ba COVID-19 ninia impaktu ba ekonomia, saúde, edukasaun no forsa traballu inklui redimentu empreza sira.

“Liga ba Cesta Bázika ne’e sei husu benefisiáriu sira simu hahan oinsá, benefisia duni ka la’e, liuliu sastifasaun benefisáriu programa, ne’ebé kuaze pergunta hamutuk 15,”  nia tenik.

Iha fatin hanesan Reprezentante Rezidente UNDP iha Timor-Leste, Munkhtuya Altangerel, hateten programa peskiza sosiu-ekonómiku ne’e suporta hosi nasaun unida ne’ebé fó apoiu tékniku hosi UNDP no United Nations Population Fund (UNFPA) hamutuk ho DGE hodi foti amostra uma-kain 5.000.

Reprezentante Rezidente UNDP iha Timor-Leste, Munkhtuya Altangerel. Imajen TATOLI/Egas Cristóvão

“Ami kontente tebes bele lansa hamutuk peskiza ne’e, liuliu fó asisténsia téknika. Peskiza ne’e di’ak tebes tanba sei kobre munisípiu 12 inklui RAEOA hodi foti amostra uma-kain 5000 inklui empreza 500, kompostu hosi negósiu ki’ik to’o médiu,” nia dehan.

UNDP sei apoiu orsamentu $450.000, maibé transferere de’it $118.000 atu fó formasaun ba entrevistadór sira ne’ebé sei uza tablet no la uza surat-tahan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here