Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 04 marsu 2021 (TATOLI)—Prezidente Tribunál Rekursu (PTR), Deolindo dos Santos, hateten ezekusaun Orsamentu Jerál Estadu (OJE) latuir Lei Orsamentu no Jestaun Finanseira (LOGF-sigla portugés) laiha sansaun legál maibé liuhosi auditoria própriu hosi Kámara Konta (Cdc-sigla portugés) mak bele kona sansaun legál.

Notísia Relevante: PN aprova Konta Jerál Estadu 2019

Prezidente Tribunál Rekursu ne’e esplika, iha buat rua ne’ebé la hanesan, ida kona-ba Konta Jerál Estadu (KJE) 2019 ne’e apresiasaun de’it hodi rekomenda ba Governu atu kumpre.

Nia fó ezemplu, iha Konta Jerál Estadu 2019 ne’e rekomenda de’it ba Governu atu kumpre rekomendasaun ne’ebé Kámara Konta rekomenda la’ós ho sansaun legál.

“Agora ba sansaun (legál) ne’e laiha tanba ne’e la’ós auditoria. Kuandu ita ko’alia kona-ba sansaun legál ne’e tenke ser iha auditoria própriu ruma ne’ebé ke haree ba kestaun ruma ka matéria ruma,” nia informa ba jornalista sira, iha resintu Parlamentu Nasionál, kinta ne’e.

Nia hatutan, bainhira liuhosi auditóriu própriu ba ministériu ruma kona-ba ezekusaun orsamentu hosi Tribunál Rekursu ne’e mak iha konsekuénsia sansaun finanseira tanba bele mosu hosi infrasaun finanseira.

Maibé nia subliña, iha rekomendasaun Tribunál Rekursu liuhosi Kámara Konta iha KJE 2019 ne’ebé aprova hosi Parlamentu Nasionál ne’e hanesan apenas rekomendasaun de’it.

Iha loron 27 janeiru 2021 liubá, Prezidente Tribunál Rekursu (PTR), Deolindo dos Santos, hateten rezultadu auditoria hosi Câmara de Contas husu Governu labele foti osan hosi fundu kontinjénsia tanba loloos ne’e atu responde situasaun urjénsia.

“Ha’u fó de’it ezemplu rua iha relatóriu Câmara das Contas nian mak sei iha nafatin ezekusaun orsamentu 2019 ba programa sira-ne’ebé la prevee iha orsamentu maibé foti osan hosi fundu kontinjénsia, enkuantu  lei la permite tanba lei hateten fundu kontinjénsia ne’e urjénsia la’ós atu taka buat sira-ne’ebé la prevee iha orsamentu,” Prezidente Tribunál Rekursu ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here