Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen TATOLI/Osória Marques.

DILI, 04 marsu 2021 (TATOLI)—Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto hatete relatóriu ba benefisiáriu ne’ebé la elizível ba subsídiu $200 sei iha prosesu rekonsiliasaun.

“Ami simu informasaun hosi Ministériu Administrasaun Estatál (MAE) katak abstratu Banku Nasionál Komérsiu Timor-Leste (BNCTL) fó mai ami,” Rui Manuel Gago Exposto hateten ba Agência TATOLI, liuhosi telefónika, kinta ne’e.

Maibé, nia dehan dadus ne’ebé liga ho subsídiu COVID-19, sei iha prosesu rekonsiliasaun iha banku tanba ne’e Ministériu Solidariedade Sosiál no Inkluzaun (MSSI) seidauk bele fó sai ba públiku.

“Ita-nia relatóriu fíziku iha ona maibé ita presiza rekonsilia ho abstratu hosi BNCTL nian,” nia dehan.

Tuir nia, bainhira dadus abstratu hosi banku loos, entaun MSSI sei anúnsia iha tempu besik katak benefisiáriu hira mak la elizível no na’in hira mak devolve ona ba kofre Estadu.

Nia esplika, ba benefisiáriu sira-ne’ebé atu re-depozita osan ba kofre Estadu ne’e, Governu liuhosi MSSI fó prazu to’o fulan tolu ne’ebé hahú hosi fulan janeiru-31 marsu 2021.

Maibé, nia dehan, liu tiha 31 marsu 2021 mak sei la re-depozita osan ba kofre Estadu, kompoténsia ne’e sei fó ba instituisaun relevante sira mak atu halo auditória ba benefisiáriu sira-ne’ebé mak simu osan refere.

Tanba ne’e, nia apela ba públiku tomak ajuda divulga informasaun loloos ba komunidade atu ajuda malu bele rezolve lalais problema re-depozita fila-fali osan subsídiu $200 ba kofre Estadu.

Jornalista: Osória Marques

Editór: Cancio Ximenes

1 KOMENTÁRIU

  1. Hw la simu osan ne, tamba hw
    Naran laiha iha hela dt
    Maibe naran ne la to ba MSS tmba chefe aldea mak hasai tia

    Ko

HAKEREK NO HATÁN

Please enter your comment!
Please enter your name here