Komandante Polísia Munisipiu Covalima, Superintendente, António de Sá. Imajen Tatoli/Eugénio Pereira

COVALIMA, 03 marsu 2021 (TATOLI) – Komandu Polísia Munisipiu Covalima koopera ho Komandu Polísia Ainaro, detein abitante na’in-10 ho diretór  Sekretaria Estadu Formasaun Profisionál no Empregu (SEFOPE) Munisípiu  Covalima tanba viola regra Estadu Emerjénsia (EE) ba da-XI.

Komandante Polísia Munisipiu Covalima, Superintendente, António de Sá, informa diretór SEFOPE Covalima ho inisiál AAG, tinan 42, halo viajen hosi Covalima ba Ainaro la iha koñesimentu hosi autoridade seguransa.

Notísia Relevante : KM aprova medida ezekusaun EE ba da-11

“Ita nia sidadaun ne’e hanesan diretór SEFOPE Covalima ho inisiál AAG halo viajen sein hetan autorizasaun hosi autoridade seguransa ba to’o Ainaro mak Komandu PNTL Ainaro detein hodi entrega fali mai polísia Covalima,” Superintendente António  de Sá, informa ba jornalista iha Komandu PNTL Covalima, kuarta ne’e.

Notísia Relevante : PN autoriza PR Lú Olo dekreta EE ba dala-XI

PNTL Covalima kontaktu kedas ekipa médiku halo teste swab ba diretór SEFFOPE Covalima ho abitante na’in-10 ne’e no submete kedas ba prosesu investigasaun atu aprezenta ba Ministériu Públiku.

PNTL konsidera ajente Estadu viola regra Estadu Emerjénsia kontra kódigu penál artigu 244 kona-ba krime dezobediénsia.

“Ami detein mós populasaun na’in-10. Polísia  la tolera sidadaun se de’it maka viola regra Estadu Emerjénsia sei prosesa ba tribunál,” António de Sá afirma.

Iha Covalima, daudaun ne’e rejista abitante na’in-10 pozitivu COVID-19 no hala’o hela tratamentu intensivu iha Sentru Izolamentu, Dili.

Tuir dadus husi Organizasaun Mundiál Saúde (OMS), iha loron 17 fevereiru 2021, infesaun hosi virus Covid nian, SARs-Cov-2 iha mundu  rejista kazu konfirmadu hamutuk 109,217,366 no hamate ema hamutuk 2,413,912 .

Iha Indonézia rejista kazu  infesaun SARs-CoV-2 hamutuk  1,233,959 no hamate ona ema 33,596 iha provínsia 34, inkluindu Nusa Tenggara Timur (NTT) ne’ebé́ nia kazu konfirmadu aumenta ba 7,517.

Jornalista        : Eugénio Pereira

Editór              : Francisco Simões

HAKEREK NO HATÁN

Please enter your comment!
Please enter your name here