Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 03 marsu 2021 (TATOLI)Sekretaria Estadu Kooperativa (SEKoop) realiza semináriu ho tema ‘Dezenvolvimentu Kooperativa iha Post COVID-19’, hamutuk ho movimentu kooperativa sira, hodi haree hamutuk progresu dezenvovimentu no impaktu kooperativa ativu sira, iha situasaun pandemia globál, nune’e bele foti medida hamutuk.

Sekretáriu Estadu Kooperativa, Elizário Ferreira, hateten semináriu ne’e atu konsolida forsa no matenek atu hatan ba movimentu kooperativa.

“Kuandu COVID-19 ne’e hotu saida maka sei akontese iha dezenvolvimentu kooperativa ou laiha dezenvolvimentu, iha progresu ka lae, no saida maka akontese bainhira situasaun COVID-19 la’o hanaruk liután,” Sekretáriu Estadu Elizário iha ámbitu semináriu, iha Federasaun Hanai Malu, Bairro Pité, kuarta ne’e.

Tanba ne’e, movimentu kooperativa kréditu ne’ebé maka eziste ho membru kooperativa hamutuk 16.000 ativu no kapitál hamutuk $29.000, iha responsablidade asegura kapitál, asegura estabilidade finaseira ka ekonómiku kooperativa atubele sirkula osan ba bem estar povu.

“Ohin semináriu ne’e atu haree posibilidade sira iha situasaun COVID-19 no saida maka ita bele halo,” nia akresenta.

Iha Sorin seluk, Prezidente Kooperativa Uniaun Kréditu Hisik Kosar Hadia Moris (HIKMOR) iha Aileu, Lurdes Mendonca Ramos, hateten kooperativa ne’e hahú moris iha tinan 2013 ho fundu dahuluk $239 no agora fundu to’o ona $199.000, ho membru hamutuk 272.

“Durante COVID-19 ami prepara produtu kooperativa ba programa rekuperasaun ekonómika, liu-liu iha Cesta Bázika hanesan foos mina, super mie, sabaun, rinso no seluk tan, maski la barak maibé ami kontribui ba ami-nia membru sira,” nia hatutan.

Kooperativa HIKMOR durante ne’e halo atividade  rai osan no fó empresta osan ba membru sira hodi halo negósiu no kuda modo.

“Maibé dezafiu ne’ebé ami hetan iha períodu pandemia maka bainhiea fó empréstimu ba membru sira, ita atu husu maibé sira dehan osan laiha, ida-ne’e dezafiu ba ami,” nia katak.

Maski nune’e, responsável ne’e nafatin otimista halo atividade rai osan hodi fó empresta ba membru sira.

Jornalsta: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here