Atividade Petrolífera iha kampu Bayu-Undan. Imajen/Conocophillips

DILI, 03 marsu 2021 (TATOLI)Empreza australiana Santos nu’udar operadór iha Bayu-Undan, halo ona desizaun finál ba investimentu iha programa perfurasaun mina-matan tolu iha kampu Bayu-undan, iha Tasi Timór, ho kustu millaun $235.

“Ami planeia halo perfurasaun iha Bayu-undan Infill Wells 3c, iha trimestre daruak (Q2) tinan ne’e, tanba ne’e programa ne’e sei estende tempu produsaun iha kampu petrolífera no mantein timor-oan sira serbisu inklui fó oportunidade negósiu barak liután ba emprezáriu lokál sira,” refere nota impresa ne’ebé Agência TATOLI asesu, kuarta ne’e.

Programa ne’e inklui ona posu produsaun tolu hanesan plataforma rua no submarinu ida, ne’ebé sei dezenvolve rezerva adisionál ba gás naturál no líkidu, hodi hanaruk tempu útil kampu no instalasaun sira iha rai-maran no planta LNG iha Darwin.

Hafoin projetu ne’e hetan aprovasaun, empreza australiana ne’e sai operadór ba Joint Venture iha kampu Bayu-undan, hafoin finaliza akizisaun ativu ConocoPhillips iha Austrália norte no Timor-Leste.

Posu sira-ne’e sei fura uza torre-perfurasaun auto-elevatória Noble Tom Prosser, ho posu programadu dahuluk.

“Espera produsaun posu dahuluk ne’e sei hahú iha trimestre datoluk (3Q) tinan 2021,” subliña nota imprensa.

Antes ne’e, Diretór Ezekutivu Santos, Kevin Gallagher, apresia bele hetan oportunidade otimiza rekuperasaun kampu petrolífera, hanaruk  tempu produsaun no iha posibilidade hatama valór signifikativu ba Joint Venture Bayu-undan no povu Timor-Leste.

“Liuhosi relasaun serbisu di’ak no konstrutivu ho Governu Timor-Leste inklui parseiru, bele atinje objetivu komún másimiza rendimentu kampu Bayu-undan,” refere nota ne’e.

Perfurasaun mina-matan ne’e bele aumenta tan barríl millaun 20 resin minarai, ne’ebé ekivalente ho rezerva bruta inklui produsaun ho kustu abastesimentu ki’ik, hanaruk tempu serbisu iha kampu, hamenus períodu ne’ebé LNG Darwin sai inoperasionál (offline) molok projetu Barossa nian tama iha funsionamentu.

Santos atualmente iha partisipasaun 68,4% hanesan operadór iha kampu Bayu-undan no LNG Darwin, ne’ebé sei redús ba 43,4%, hafoin konklui tiha fa’an asaun ida ho 25% ba SK E&S.

Konkluzaun fa’an asaun agora iha prosesu nia laran, ho konsentimentu Joint Venture Bayu-Undan/DLNG no entidade reguladora Timor-Leste ne’ebé hetan ona molok Natál tinan kotuk no iha progresu di’ak kona-ba aprovasaun entidade reguladora australiana nian.

Tranzasaun sei konklui bainhira foti ona desizaun finál ba investimentu iha Barossa iha semestre dahuluk tinan 2021.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here