Kooperativa Agríkola. Imajen/Espesiál

DILI, 03 marsu 2021 (TATOLI)Sekretaria Estadu Kooperativa (SEKoop) daudaun ne’e rejista kooperativa hamutuk 71 mak kontinua eziste 71 hodi hala’o atividade ekonómika iha situasaun COVID-19.

Tuir Sekretáriu Estadu Kooperativa, Elizário Ferreira, kooperativa ne’ebé maka kontinua eziste maka kooperativa kréditu uniaun no kooperativa multi setorál balun.

“Iha kooperativa 101, maibé ida agora daudaun kooperativa 71 mak ativu, atividade funsiona nafatin, laiha kooperativa ida maka iha degradasaun iha períodu COVID-19,” Sekretáriu Estadu Elizário informa iha ámbitu abertura semináriu ho tema ‘Dezenvolvimentu Kooperativa iha Post COVID-19’, iha Federasaun Hanai Malu, Bairro Pité, kuarta ne’e.

Nia dehan, kooperativa sira ne’e funsiona ho di’ak ein termu tékniku, jestaun rekursu umanu, rekursu finaseiru no jestaun patrimóniu kooperativa nian.

Governante ne’e nota katak, durante COVID-19 kooperativa sira enfreta krize, liuliu empréstimu (kooperativa kréditu) tanba populsaun menus rendimentu.

“Normalmente krize ne’ebé sira hasoru hanesan problema risku kreditu, tanba rendimentu populasaun nia laiha no dezenvolvimentu ne’e tarde, balun la konsege dezenvolve entaun problema sira enfrenta maka kréditu mal paradu,” nia akresenta.

Bazeia ba dekretu lei númeru 16/2004, iha tipu kooperativa 13 ne’ebé presiza estabelese iha Timor-Leste, maibé daudaun foin iha neen.

Ramu kooperativa ne’ebé iha hanesan kréditu uniaun ho totál 96 ho nia totál kapitál $6.125.496,56 husi membru hamutuk 12.679, kooperativa haat hetan apoia orsamentu husi subvensaun públika, enkuantu kooperativa seluk maioria halibur osan husi komunidade sira.

Multi setorál hamutuk 52 ho totál kapitál $515.413,57 husi membru hamutuk 1.642, agrikultura iha 19 ho membru 368, ho totál kapitál $52.213, peska iha 15 ho membru 369, ho totál kapitál $24.122.

Nune’e mós, pekuária iha 3 ho membru 185, ho totál kapitál $982 no indústria iha neen, ho kapitál $17.899, ne’ebé halibur membru hamutuk 83.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here