Prezidente Repúblika,Francisco Guterres Lú Olo. Imajen Tatoli/António Gonçalves.

(Mensajen hosi Prezidente Repúblika Francisco Guterres Lú olo ba Loron Veteranu Sira-Nian)

“Iha loron espesiál ohin, ha’u husu fila-fali ba maluk halibur iha Konsellu Kombatentes Libertasaun Nasionál atu haree hamutuk oinsá:  (1) Grava lalais istória hosi kombatente ida-idak ne’ebé sei moris tanba ita lakon ona ema barak iha tempu ukun-aan. Bainhira ida mate, ita lakon daudaun parte ida hosi ita-nia istória koletiva,” Prezidente Repúblika, Francisco Guterres Lú Olo.

Maluk kombatentes Libertasaun Nasional!

Faluk no oan kiak sira!

Povu Timor-Leste tomak!

Ohin,  loron feriadu nasionál ida tanba iha signifikadu espesiál tebes iha ita-nia istória luta,  atu bele mós afirma-an nu’udar Povu no Nasaun.

Tinan haat nulu liubá, iha 3 marsu 1981, tuir rejistu istóriku iha dokumentu oioin, kuadru superior FRETILIN sobrevivente sira hamutuk ho funu-nain barani, hala’o Konferénsia Nasional iha Maubai/Viqueque. Konferénsia ne’e deside hatuur estrutura foun, Conselho Revolucionário da Resistênsia Nacional (CRRN), hili responsável foun hodi kaer fali erói no mártir sira-nia knaar no define estratéjia foun ba ita-nia luta Libertasaun Nasionál.

Tanba ninia importánsia istórika aas tebes mak loron 3 marsu konsagra ona, nu’udar Loron Veteranus sira-nian, liuhusi Lei n.° 3/2016. 

Laiha serimónia ofisiál organiza hosi Estadu Timor-Leste maibé ita hotu, iha uma ka iha fatin ne’ebé de’it, labele haluha hahii ita-nia mártir no erói sira iha loron ohin.

Keta haluha katak, ohin loron, ita moris ho liberdade tomak tanba ita-nia Kombatente Libertasaun Nasionál, iha rai laran, fó-aan to’o mate, terus iha kadeia no simu sakrifísiu oioin no iha rai-li’ur, timoroan barak ho espíritu no mehi hanesan, buka hetan apoiu husi komunidade internasionál ba ita-nia direitu sira, nu’udar Povu ho identidade rasik.

Haree ba períodu hosi 1975 to’o 1999 akontese violénsia, tortura, prátika jenosídiu no etnosídiu hosi forsa okupasionista sira. Maibé, iha períodu hanesan, ita hametin liután ita-nia brani, ita-nia determinasaun, ita-nia valores no prinsípius, ita-nia espíritu koletivu hanoin malu, tulun malu, fó-liman ba malu, la haree ba mane ka feto, ferik ka katuas, la haree ba  rasa, etnia, relijiaun ka mai hosi reinu ne’ebé de’it.

Ohin iha tempu Ukun-aan, ita presiza kaer nafatin espíritu luta nian atu bele lori dezenvolvimentu ba oin. Dezenvolvimentu ida-ne’ebe hothotu iha direitu ba hela iha uma desente ida, ho bee, eletrisidade no hahán báziku, direitu ba saúde no edukasaun.

Kona-ba direitu ba Edukasaun, Ministériu Ensinu Superior fó-hatene mai ha’u katak ba tinan ida ne’e, veteranus nia oan atus neen neen nulu resin ida (661), mak pasa exame no bele tama iha UNTL no Institutu Politékniku Betano, atu tuir kursu universitáriu oioin. Ha’u hakarak husu ba maluk sira hotuhotu atu hanoin katak oan sira bele iha susesu, la´ós husi de’it ho diploma husi Universidade maibé bele hetan dalan diak ba sira-nia futuru, liuhusi mós kursu tékniku-profisionál, atu sai eletrisista, kanalizador, mekániku, karpinteiru, pedreiru, agrikultor, tékniku hakiak manu no animál sira seluk, torneiro-mekániku no seluk tan. Husu ba Mnistériu Edukasaun no SEFOPE atu haree liuliu ba kursu sira ne’ebé forma ita-nia ema nu’udar rekursu produtivu.

Molok ramata ha’u husu maluk kombatente sobrevivente sira atu ajuda Konsellu Kombatentes Libertasaun Nasionál atu servisu hamutuk ho Estadu, atu valoriza di’ak liután eis-kombatente sira, liuhusi polítika ida-ne’ebé tau matan ba sira, maibé haburas mós espíritu moris ho kbiit rasik, liuhusi Fundu Veteranus, ne’ebé fó  benefísiu ba sira ne’ebé sei moris, ba oan no bei’oan sira aban bainrua.

Iha loron espesiál ohin, ha’u husu fila-fali ba maluk halibur iha Konsellu Kombatentes Libertasaun Nasionál atu haree hamutuk oinsá: 

1 – Grava lalais istória husi kombatente ida-idak ne’ebé sei moris tanba ita lakon ona ema barak iha tempu ukun-aan. Bainhira ida mate, ita lakon daudaun parte ida husi ita-nia istória koletiva;

2-  Ajuda eduka ita-nia ema atu respeita Konstituisaun RDTL no hametin valores no prinsípius  luta Libertasaun Nasionál nian;

3-  Ajuda Governu atu dezenvolve lalais turizmu istóriku.

Viva Veteranos de Timor-Leste!

Viva Povu heróico de Timor-Leste!

Viva Timor-Leste livre e independente!

Palásiu Prezidensiál Nicolau Lobato

Dili, kuarta (03 marsu 2021).

 

HAKEREK NO HATÁN

Please enter your comment!
Please enter your name here