Membru Unidade Polísia Fronteira (UPF) no FALINTIL-Forsa Defeza Timor-Leste (F-FDTL) blokea estrada iha área Postu Administrativu Tilomar hodi evita abitante sira halo viajen hosi Covalim (Suai) ba Fatumea. Imajen Tatoli/Eugénio Pereira.

DILI, 03 marsu 2021 (TATOLI)–Pontu Vokál Munisípiu Bobonaro, Emerenciana Nipu, hatete Polísia Nasionál Timor Lorosa’e (PNTL) ho FALINTIL Forsa Defeza Timor-Leste (F-FDTL) ne’ebé mak halo seguransa ba área afetadu moras COVID-19 menus fasilidade.

“Ita-nia PNTL ho F-FDTL ninia servisu iha terrenu tuir observasaun ne’ebé ami nota katak sira menus fasilidade no ekipamentu hanesan máskara no desinfetante. Realidade dala balun inisiativa hosi pesoál segurnsa uza rasik sira-nia osan hodi sosa hafoin uza hodi prevene sira-nian aan rasik,” Pontu Vokál Munisípiu Bobonaro, Emerenciana Nipu hatete via Skype, iha salaun FONGTIL, Caicoli, Dili, kuarta ne’e.

Aleinde ida-ne’e, nia hatutan, maske transporte mós avária no laiha manutensaun maibé Postu Cailaco, Postu Lolotoe, Postu Balibo no Postu Atabae, hetan kooperasaun di’ak entre PNTL ho Polísia Marítima uza ba tempu emerjénsia.

Maibé, nia dehan, agora transporte sira-ne’e la uza ona tanba Polísia Marítima mós uza ba sira-nia área servisu nian iha fatin seluk, no iha Postu Maliana iha karreta maibé ba tranzitu, investigasaun prevensaun nian de’it.

Pontu Vokál FONGTIL nian iha Bobonaro ne’e haktuir, komunikasaun rádiu eziste ona iha ne’ebá maibé la funsiona hanesan rádiu iha Postu Cailaco, Postu Lolotoe, Postu Balibo, Postu Atabae, Postu Bobonaro, no Postu Maliana.

“Maske avária hotu ona maibé la iha manutensaun no sistema avária hotu ona,” nia hateten.

Tuir nia, edifísiu  Komando Polísia Bobonaro, iha 2020 hetan apoiu hosi Telkomcel (BOX-sistem RE: uza sms gratuita) atu hafasil servisu seguransa nian durante situasaun COVID-19.

“Susar duni atu komunika ba ekipa no postu sira tanba durante ne’e sistema avária no nia signál labele asesu fatin hotu-hotu. Durante ne’e komandante de’it mak hetan HP no pulsa gratuita ofisiál hosi PNTL,”  nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here