Kuarentena Covalima. Imajen Tatoli/Eugénio Pereira

COVALIMA,  02 marsu 2021 (TATOLI)- Timoroan hamutuk na’in 21 daudaun ne’e submete hela iha konfinamentu obrigatóriu ka kuarentena  Munisípiu Covalima.

Polísia blokeia totál movimentu iha Postu Administrativu Zumalai, Covalima. Imajen Tatoli/Eugénio Pereira

Timoroan hirak-ne’e kompostu hosi feto 12, mane na’in-sia. Maioria abitante sira ne’e estudante Timoroan ne’ebé halo viajen ilegál hosi Atambua-Indonézia liu fronteira terrestre Covalima nian no purvolta na’in-10 hosi Aldeia Klauhalek, Suku Belulik Leten, Postu Administrativu Fatumean no Aldeia Onu-Laran, Suku Maudemu, Postu Administrativu Tilomar, ne’ebé halo kontaktu direita ho pasiente pozitivu COVID-19.

Notísia Relevante : Forsa Unidade Territoriál 150 destaka iha Covalima

Xefe Ekipa Vijilánsia no Epidemolojia ho Laboratóriu Munisípiu Covalima, Serafin Moniz dehan, abitante hirak-ne’e sei kumpre konfinamentu obrigatóriu durante loron 14 atu ekipa médiku avalia sira-nia kondisaun saúde, liu hosi teste swab no bainhira identifika negativa, sira bele re-integra fali ba sosiedade.

Ba estudante nain haat ne’ebé tama ilegál sei entrega sira ba Komandu PNTL Covalima, tanba halo viajen ilegál kontra regra Estadu Emerjénsia.

Ekipa Vijilánsia no Epidemolojia ho Laboratóriu Ministériu Saúde kontinua fahe ekipa hodi ba rekolla amostra swab iha Postu Administrativu Fatumean, Zumalai, Maukatar no Tilomar.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here