Atividade iha sala plenária Parlamentu Nasionál. Imajen TATOLI/António Gonçalves.

DILI, 02 marsu 2021 (TATOLI)—Parlamentu Nasionál, tersa ne’e, aprova projetu-rezolusaun hodi nune’e uma fukun nakloke ba sidadaun no sosiedade sivíl sira iha atividade parlamentár.

Objetivu hosi projetu-rezolusaun ne’e atu garante partisipasaun efetiva hosi sidadaun no sosiedade sivíl sira iha prosesu demokrátiku, reprezenta aspirasaun no nesesidade Timoroan sira-nian.

Projetu-rezolusaun númeru 28/V(1a) ne’e aprova ho rezultadu votasaun a-favór 51 no abstensaun 3.

“Ho nune’e projetu-rezolusaun númeru 28/V(a) aprovadu,” Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, anúnsia liuhosi plenária, Parlamentu Nasionál.

Tuir testu projetu-rezolusaun ne’ebé Agência TATOLI asesu, projetu ne’e bazea Konstituisaun RDTL artigu 63 ne’ebé promove partisipasaun feto no mane iha vida polítika, ne’ebé konstitui kondisaun no instrumentu fundamentál iha sistema demokrátiku.

Tanba konstituisaun fó posibidade ba sidadaun Timoroan sira hodi partisipa ho forma efetiva, iha prosesu desizaun polítika, ezerse ativa iha kontrolu krítiku iha diverjénsia opiniaun, kria, hamosu kontributu polítika ba realizasaun aspirasaun Timoroan sira-nian.

Objetivu seluk hosi projetu-rezolusaun ne’e hodi kontribui ba ezersísiu sidadania ne’ebé ativu liu iha prosesu governasaun no garante partisipasaun sidadaun sira no organizasaun sosiedade sivíl sira iha prosesu demokrátiku.

Ho nune’e aprofunda tán demokrasia iha Timor-Leste, hasa’e kualidade reprezentasaun demokrátika no garante afirmasaun Parlamentu nian nu’udar órgaun sentrál ba debate públiku sira. Parlamentu Nasionál propoin estabelese faze dahuluk programa “Lian Povu” ne’ebé hanaran debate sidadaun.

Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa, fundamenta atu garante efetiva sidadaun sira-nian iha prosesu demokrasia no haklaken momoos dezenvolvimentu ne’ebé nakait ba-malu hodi hatutan aspirasaun povu Timor-Leste nian.

“Ho inisiativa ida-ne’e Parlamentu Nasionál hakle’an demokrasia iha Timor-Leste no mós eleva kualidade reprezentasaun demokrátika, laiha buat seluk hosi hakotu lia iha parlamentu hanesan órgaun sentrál debate públika ne’ebé reprezenta sidadaun Timoroan sira,” nia dehan.

Prezidente G ne’e argumenta, parlamentu debate ho sidadaun la halakon kompeténsia saida de’it tanba órgaun reprezentantivu.

Iha projetu-rezolusaun artigu hamutuk 12, ne’ebé ko’alia kona-ba kriasaun inisiativa debate ho sidadaun sira, objetivu atu promove edukasaun sívika, iha debate públiku ne’e kompeténsia iha komisaun espesializada sira, ekidade no partisipasaun instituisionál.

Artigu 8 hosi artigu 12 ko’alia kona-ba faze programa, faze dahuluk eskolla área temátika abranjida.

Faze daruak konvite hosi komisaun espesializada sira ba responsável iha área sívika pelumenus instituisaun tolu ka individuál hosi sosiedade sivíl liuhosi audiénsia públika maibé bazea ba temátika ne’ebé eskolla ona iha faze dahuluk.

Faze datoluk halo análize téknika konjunta entre individuál hosi sosiedade sivíl no komisaun espesializada sira kona-ba área temátika ne’ebé eskolla ona.

Faze dahaat mak halo ajendamentu denifitivu ba debate iha plenária ho partisipasaun obrigatóriu hosi membru Governu ne’ebé responsável ba área temátika korrespondente sira.

Purtantu artigu 9 hosi projetu-rezolusaun ne’e hateten, debate ne’e obrigatóriu divulga liuhosi Rádiu no Televizaun Parlamentu Nasionál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here