Prokuradór Jerál Repúblika, José da Costa Ximenes. Imajen Tatoli/Dok

DILI, 02 marsu 2021 (TATOLI)- Prokuradoria Jerál Repúblika (PGR), tersa ne’e, hala’o  asinatura nota entendimentu (MoU) ho UNICEF  atu haree kona-ba  labarik sira-nia direitu.

Serimónia ne’e hala’o iha edifísiu PGR,Colmera, Dili, ne’ebé asina direita hosi Prokuradór Jerál Repúblika, José Ximenes ho Adjuntu reprezentante UNICEF iha Timor-Leste, Scoot Whoolery.

José Ximenes, hateten PGR hetan onra hodi selebra kooperasaun ida ho UNICEF nu’udar organizasaun  Nasaun  Unida nian ne’ebé ka’er papél fundamental ba promosaun defeza no promove direitu ba labarik iha Timor-Leste.

Nia hatutan, ho akordu ne’e sei servisu hamutuk atu promove promosaun ba kuadru prokuradór sira, atu bele tau atensaun, ba labarik no família kuandu violénsia akontese.

“Kooperasaun formal ida ne’e, parte rua sei halo livru sei halo produsaun ho ezemplár 1000, iha lian Tetun, Portugés no Inglés,” José Ximenes hateten.

Akordu ne’e nia orientasaun mós abranje ba formasaun no halo aprezentasaun ida ne’ebé envolve sosiedade sivíl no instituisaun save sira, atu bele halo defeza ba direitu labarik sira nian.

Adjuntu reprezentante UNICEF iha Timor-Leste, Scoot Whoolery hateten, kooperasaun ida-ne’e atu haree oinsá  UNICEF no PGR atu hametin liután labarik sira iha Timor atu goza sira-nia direitu tomak ne’ebé iha hodi redús problema sira. Liu-liu aumenta mós kapasidade no abilidade prokuradór, juis ne’ebé ka’er ba iha prosesu menór, atu haree kona-ba labarik sira ne’ebé enfrenta problema iha sira-nia moris.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here