Traballadór sira ezekuta hela obra Estadu iha terrenu. Imajen TATOLI/António Gonçalves

DILI, 02 marsu 2021 (TATOLI)Vise-Primeiru Ministru no Ministru Planu no Ordenamentu (MPO), José Maria dos Reis, halo aprezentasaun iha reuniaun Konsellu Ministru (KM), kona-ba planeamentu no orsamentasaun ba projetu foun tinan 2022 no ezekusaun projetu iha tinan 2021 nian hodi Fundu Infraestrutura (FI).

“Objetivu prinsipál hosi aprezentasaun ne’e hodi membru Konsellu Ministru sira análiza prosesu preparasaun, submisaun no implementasaun projetu iha liña ministeriál ne’ebé sei ezekuta liuhosi Fundu Infraestrutura, atu entidade hotu bele serbisu ho lalais dentru kalendáriu, kompleta prosesu, hatene idaidak ninia projetu, no konsiente nafatin ho prioridade hirak ne’ebé maka define ona,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, tersa ne’e.

Iha aprezentasaun ne’e, membru KM haree ba sírkulu projetu hosi faze planeamentu, dezeñu, orsamentu no faze sira hotu to’o implementasaun no entrega obra sira iha setór infraestrutura.

“Konsellu Ministru apresia tebes aprezentasaun ida-ne’e no nota katak iha esforsu boot no mudansa pozitivu atu ordena liután projetu sira iha Fundu Infraestrutura, nune’e bele iha disiplina di’ak liután hosi parte liña ministeriál sira no bele iha métodu planeamentu di’ak no kontribui ba rasionalizasaun no uzu másimu rekursu Estadu, ne’ebé dala barak ladún jere ho di’ak tanba falta kontrolu,” Portavós Governu subliña.

Iha orsamentu 2021, prevee millaun $339 ba Fundu Infraesturura no hosi montante orsamentu ne’e mós deskreve millaun $41,588 ekipamentu komputadór no millaun $338 ba kapitál dezenvolvimentu, $32.000 ba saláriu no vensimentu, millaun $1,040 ba bens (sasán) no servisu

Introdusaun hosi FI bazea ba Planu Estratéjiku Dezenvolvimentu Nasionál (PEDN) 2011-2030.

Iha Fundu Infraestrutura ne’e mós prevee $60.000 ba boa governasaun no jestaun institusionál, setór agrikultura millaun $3,798, água no saneamentu millaun $3,449, dezenvolvimentu urbanu no rurál millaun $6,190, edifísiu públiku millaun $7,693, edifísiu edukasaun millaun $4,843, enérjia elétrika millaun $18,321, ekipamentu komputadór millaun $41,588, saúde millaun $4,844.

Nune’e mós, seguransa no defeza millaun $13,884, solidariedade sosiál millaun $1, projetu tasi mane millaun $8,5, aeroportu millaun $19,843, preparasaun dezeñu no supervizaun ba projetu foun millaun $9,441, estrada millaun $105,215, ponte millaun $4,896, portu millaun $1,814.

Programa ba setór turizmu $652.00, programa empréstimu millaun $70,700, programa setór finansa millaun $2,905, Sekretaria Estadu Juventude no Desportu (SEJD) millaun $2,034, Komisaun Administrasaun Fundu Infraestrutura (KAFI) millaun $1,011, programa manutensaun no reabilitasaun millaun $6,924.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here