Diretór Ezekutivu Fundasaun Mahein, João Almeida Imajen Tatoli/Eugénio Pereira

DILI, 02 marsu 2021 (TATOLI)-Diretór Ezekutivu Fundasaun Mahein (FM), João Almeida, hateten iha ámbitu komemorasaun loron mundiál defeza sivíl (World Civil Defence Day), 03 marsu 2021,   autoridade integradu Estadu hanesan militár, polísia no seguransa sivíl  presiza halo reflesaun ba  ninia papél hodi responde ba kestaun defeza sivíl.

Kada tinan,  iha loron 03 marsu, Estadu sira iha mundu selebra loron mundiál  Defeza Sivíl (World Civil Defence Day) no  atu  konsidera hanesan memória ba loron-ne’e nasaun lubun harii ka estabelese ona organizasaun ida naran organizasaun internasionál defeza sivíl (ICDO, sigla ingles).

ICDO ne’e organizasaun entre Governu sira ne’ebé sai membru ba organizasaun ne’e  ho objetivu atu kontribui ba malu hodi garante protesaun no apoia ba povu no dezenvolvimentu nasaun sira ho serteza ba próteze povu iha dezastre naturaís no apoiu umanitária.

ICDO ne’e harii ka estabelese iha tinan 1931. To’o agora ICDO iha nia membru nasaun 57; kompostu hosi nasaun-18 hanesan nasaun observadór no nasaun-23 hanesan membru afiliasaun. ICDO hahú iha tinan 1931 iha Paris no Jenerál ida espesialista iha area forensik, Fransa nian,  George Saint-Paul maka harii Asosiasaun Zona Jeneva, hodi sai aliserse ba organizasaun defeza sivíl.

João Almeida, hateten importánsia hosi komemorasaun ne’e ba Timor-Leste ho nia  iha kontextu TL nian adopta iha lei seguransa nasionál liu-liu liga ho atuasaun ba ameasa sira ne’ebé Estadu hasoru hanesan krize sira iha rai-laran no mós krize sira bele provoka kalamidade públika no dezastre naturaís.

Nia afirma atu hatán ba situasaun sira iha lei seguransa nasionál ko’alia kona-ba atuasaun  integradu hosi elementu sistema integradu nasionál Estadu  nian ne’ebé la halakon ninia autonomia ho kompeténsia sira  hosi lei seguransa nasionál no lei defeza nasionál mós husu autoridade militár, polísia ho autoridade sivíl ninia partisipasaun iha seguransa nasionál no defeza nasionál iha ámbitu sira ne’ebé  krize dezastre naturaís, kalamidade públiku oinsá elementu esensiál Estadu ninian atu bele partisipa organiza kompeténsia iha sentru integradu jestaun krize ninian hanesan pandemia COVID-19 ne’ebé daudaun mundu enfrenta inklui Timor-Leste.

“Komemorasaun sira ne’e, la’ós de’it komemora, maibé hanesan reflesaun atu bele haree fila-fali papél importante hosi autoridade sira ne’ebé toma kompeténsia no misaun iha defeza sivíl ninian hodi bele halo atuasaun ba situasaun sira ne’ebé akontese,’’ Diretór Ezekutivu Fundasaun Mahein (FM), João Almeida hateten hodi responde Agéncia Tatoli iha nia kna’ar, Dili, tersa ne’e.

Nia hatutan, iha difikuldade  liu-liu iha koordenasaun ba atuasaun iha kazu sira dezastre naturaís, asisténsia umanitária nia tanba ne’e hanesan reflesaun ida oinsá bele integra iha ámbitu lei no polítika liu-liu iha implementasaun .

João Almeida, esplika prátika defeza sivíl iha Timor-Leste mak iha konseitu iha lei seguransa nasionál  bolu sistema integradu seguransa nasionál atu hatán ba situasaun la’ós de’it ba ameasa sira funu ka agresaun militár,  maibé ba mós ameasa dezastre naturaís ho kalamidade públika hanesan  situasaun COVID-19.

“Pandemia COVID-19 fó lisaun ida atu bele haree fila-fali autoridade sira ne’ebé servisu liga situasaun sira ne’ebé presiza Estadu ninia intervensaun iha ámbitu militár, polísia  no mós sivíl ninian,’’ João Almeida hateten.

Diretór Fundasaun Mahein, João Almeida, hatutan komemorasaun loron mundiál defeza sivíl ba tinan ne’e  ninia importánsia ba Timor-Leste hanesan pandemia COVID-19 nu’udar  reflesaun no lisaun ida oinsá atu bele haree ba importánsia  liga ba defeza sivíl liu-liu tanba ho COVID-19 afeta ba vida sosiál no ekonomia ida ne’e bele provoka inseguransa iha sosiedade hanesan  hamlaha, ki’ak tanba kalamidade públika.

 “Loron defeza sivíl nu’udar loron importante tebes Timor-Leste la sees hosi importánsia defeza sivíl ninian tanba ita labele moris mesak iha rejiaun ida atu labele izola an hosi komunidade internasionál,’’ João Almeida hateten

Nia epslika iha konstituisaun RDTL ko’alia kona-ba solidariedade internasionál hanesan baze ida ba sosiedade sira  enkuadra mós iha defeza no seguransa nasionál liu-liu partisipasaun sira iha misaun internasionál.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here