Atividade traballadór feto sira hili kafé iha Kooperativa Kafé Timor (CCT-sigla portugés), Bidau Akadiruhun. Imajen António Goncalves

DILI, 02 marsu 2021 (TATOLI)—Prezidente Konfederaaun Sindikatu Timor-Leste (KSTL), Almeiro Vila Nova, hateten empreza sira-ne’ebé atu garante direitu traballadór feto nian mak durante ne’e KSTL halo sensibilizasaun ba feto sira oinsá atu involve no partisipa iha estrutura sindikatu nian.

Notísia Relevante: Tinan 2020, KSTL rejistu kazu taballadór hamutuk 233

“Atu promove traballadór feto iha Timor-Leste, ami iha komisaun membru feto sir-ne’ebé bele fó advokasia ba direitu no interese knaar na’in sira iha servisu fatin. Entaun, durante ne’e ami halo sensibilizasaun kona-ba sindikatu traballadór enkoraja sira oinsá bele tama estrutura sindikatu nian. Tanba liuhos programa sidikatu promove ema atu defende sira-nia direitu,” Almeiro Vila Nova hateten ba Agênsia TATOLI iha nia knaar fatin, Bemori, Dili, tersa ne’e.

Nia dehan, programa ne’ebé KSTL halo sensibilizasaun ba maluk traballadór feto sira mak kona-ba direitu traballadór, violénsia domestika, jéneru, no parseiru intimu.

“Sensibilizasaun ba trabaladór feto sira hahú kedan iha fulan novembru 2020. No, iha fulan novembru ne’e, ami konsege halo workshop nasionál ne’ebé ami-nia alvu ne’e mak juvetude feto no mane atu bele hetan informasaun ba violénsia domestika, jéneru no mós intímu parseiru, inklui mós konvensaun violénsia hamosu asédiu iha knaar fatin,” nia dehan.

Atividade ne’e hala’o, nia dehan, tanba atu hasa’e kuñesimentu ba feto no mane sira liuliu juventude sira, atu nune’e sira bele komprende no bele halo prevensaun ba sira-nia aan iha servisu fatin no iha família ne’ebé mak sira hela bá.

Aleinde ida-ne’e, nia dehan, KSTL mós hasa’e kapasitasaun ba delegadu feto sira liuliu formasaun kona-ba sindikatu nian kona-ba direitu fundamental no  dever, atu nune’e hasa’e kuñesimentu feto sira-nian oinsá  atu defende sira-nia direitu iha knaar fatin, no sira mós bele halo advokasia ba sira-nia maluk ne’ebé servisu iha fatin-fatin.

“Ita hatene katak direitu fundamental feto nian mak hanesan maternidade, menstruasaun nian, lisensa bainhira akontese abortu, direitu atu hetan protesaun iha servisu kalan, no direitu atu hetan tratamentu di’ak hosi empregadór sira. Maibé direitu sira-ne’e, dala barak maluk feto sira hasoru beibeik iha sira-nia servisu fatin, tanba empregadór balun sei fó tratamentu balun ne’ebé ladi’ak ba ita-nia traballdór feto sira,” Prezidente KSTL ne’e dehan.

Tanba ne’e, nia dehan, liuhosi asaun ne’ebé empregadór sira halo ba traballadór feto sira-ne’e KSTL liuhosi ninia funsionáriu tékniku sira-ne’ebé bolu funsionáriu advokasia tun ba terenu hodi halo sensibilizasaun ba traballadór no empregadór sira ho objetivu atu minimiza violénsia hasoru feto sira iha servisu fatin.

“Ninia progresu mak ita-nia delegadu feto sira-ne’e, sira prontu ona halo advokasia ba sira-nia aan no bainhira situsaun ruma ne’ebé ataka sira-ninia psikolójia ka situasaun ruma ne’ebé akontese ne’e, sira bele atende ona,” nia dehan.

Aleinde ida-ne’e, nia hateten, feto sira ne’e mós iha ona kapasidade atu halo advokasia mós ba maluk traballadór sira seluk no sira bele iha ona konsiénsia kona-ba situasaun laborál ne’ebé sira enfrenta.

“Tanba, antes ne’e sira hanoin katak hetan servisu fula-fulan simu saláriu maibé direitu sira seluk hamutuk ho direitu saláriu ne’e, sira laiha kuñesimentu maibé liuhosi sensibilizasaun ne’e, sira hahú komprende ona direitu traballu nian tanba direitu sira-ne’e hakerek ona iha ita-nia lei 4/2012,” nia esplika.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here