Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, tersa (02/03). Imajen TATOLI/Egas Cristóvão

DILI, 02 marsu 2021 (TATOLI)—Governu liuhosi reuniaun Konsellu Ministru (KM) aprova projetu Dekretu Governu hamutuk haat kona-ba valór remunerasaun ba membru órgaun sosiál sira.

Órgaun sira ne’e mak Eletricidade de Timor-Leste, Empreza Públika (EDTL,E.P), Bee Timor-Leste, Empreza Públika (BTL,E.P), no Institutu Públiku Autoridade Nasionál ba Eletrisidade (ANE,I.P) no Autoridade Nasionál ba Bee no Saneamentu, Institutu Públiku (ANAS,I.P).

“Projetu Dekretu Governu ne’e define valór remunerasaun ba membru órgaun sosiál sira ne’ebé aprezenta hosi Ministru Obra Públika, Salvador Soares dos Reis Pires, ne’ebé aprovadu ona hosi membru Konsellu Ministru,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, tersa ne’e.

Biban ne’e, aprova mós valór ba seña prezensa sira, katak membru Konsellu Administrasaun no membru Konsellu Fiskál sira iha direitu atu simu ninia partisipasaun iha sorumutuk órgaun empreza públika no institutu públiku sira ne’e.

Enkuantu, valór hirak ne’e sei bele altera, tuir aprovasaun rejime remuneratóriu aplikável ba administrasaun indireta Estadu nian iha futuru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here