Ekipa Vizilánsia no Epidemolojia ho Laboratóriu Ministériu Saúde rekolla amostra screening masál ba abitante iha Sentru Esperansa ba Feto Salele, Covalima. Imajen Tatoli/Eugénio Pereira.

DILI, 02 marsu 2021 (TATOLI)—Institutu Nasionál Siénsia no Teknolojia (INCT sígla portugés), husu ba Ministériu Saúde (MS) atu halo esplikasaun didi’ak no adekuadu kona-bá konteúdu loloos hosi vasinasaun COVID-19, tanba to’o oras ne’e populasaun maioria sei dúvida ho programa ne’ebé sei realiza iha fulan abríl-nia rohan.

Prezidente Ezekutivu INCT, José Cornélio Guterres husu ne’e, tanba simu rekomendasaun hosi auoridade munisípiu lima hanesan Ermera, Liquiçá, Manatuto, Baucau no Manufahi ne’ebé partisipa iha diskusaun meza redonda foin lalais ne’e, organiza hosi INCT rasik.

Notísia Relevante:Governu sei sosializa vasinasaun AstraZeneca durante fulan rua

“Ita-nia populasaun hosi munisípiu lima sei dúvida ho programa vasinasaun COVID-19. Rezultadu diskusaun ne’e, INCT foti konkluzaun katak, populasaun presija hetan informasaun adekuadu,” José Cornélio hateten ba jornalista Agência Tatoli iha serbisu fatin Balide, tersa ne’e.

Nia dehan, durante diskusaun, autoridade munisipál-sira kestiona liuliu kona-bá Ministériu Saúde tenke aprezenta estudu-ruma liga ho durasaun tempu vasinasaun, no tenke garante katak hosi vasinasaun ne’e COVID-19 sei la hada’et.

INCT promove diskusaun iha 25 fevereiru atu fó apoiu ba mekanizmu vasinasaun COVID-19, liu hosi meza redonda ne’ebé envolve péritu-sira hosi instituisaun oioin, iha salaun Delta Nova.

Diskusaun meza redonda ne’e nu’udár alternativa ida hodi hatuur mekanizmu-ruma, no bele rekomenda ba Governu atu implementa vasinasaun ne’e iha TL.

INCT nu’udár sentru peskiza ba dezenvolvimentu Akadémiku no Ensinu Superiór-sira hodi halo inovasaun, ho nia estatutu hatuur iha Dekretu-Lei númeru 23/2014, loron 3 Setembru.

Kona-bá preokupasaun ne’e, antes ne’e Governu liuhosi Komisaun Nasionál Prevensaun COVID-19, Ministériu Saúde (MS) deklara ona katak, sei halo sosializasaun uluk ba komunidade molok realiza programa vasinasaun ne’e iha Timor-Leste.

Tuir planu, sosializasaun ne’e sei hala’o durante fulan rua hahú iha fulan marsu atu esplika kona-bá natureza no sentidu loloos hosi vasinasaun ne’e.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here