Traballadór sira hatun foos iha Portu Dili. Imajen Tatoli/António Gonçalves

DILI, 02 marsu 2021 (TATOLI)-Governu liuhosi Ministériu Koodenadór Asuntu Ekonómiku (MKAE) no Ministériu Túrizmu, Komérsiu no Indústria (MTKI), koopera ho Sentru Lojístika Nasionál (CLN, sigla portugés) atu distribui foos halo intervesaun merkadu iha munisípiu Covalima no Bobonaro.

“Ita serbisu hamutuk ho MKAE no CLN, nune’e tempu besik sei halo intervensaun merkadu tanba simu ona pedidu formál hosi Autoridade munisípiu Covalima no Bobonaro iha semana kotuk,” Ministru Turizmu, Komérsiu no Indústria, José Lucas do Carmo da Silva, hateten iha Palásiu Governu, tersa ne’e.

Iha jullu 2020, armazen CLN simu foos importasaun tonelada 35.000 ne’ebé foin mak hasai kuaze tonelada 7.000-resin ba ajuda umanitária, liuliu dezastre naturál no responde pedidu balun.

Daudaun sei iha tonelada kuaze 20.000 ne’ebé sufisiente atu halo intervesaun merkadu.

Aleinde ne’e, Ministru  Kordenadór Asuntu Ekonómiku, Joaquim Amaral, fó orientasaun ona ba CLN atu halo distribuisaun foos ba munisípiu Covalima no Bobonaro, liuliu postu administrativu Fatumean.

Notísia relevante: Foos saka 400 sei distribui ba abitante aldeia tolu iha Fatumean

Iha sorin seluk, Ministériu Solidaridade Sosiál no Inkluzasaun (MSSI) mós distribui ona apoia umanitária ho foos saka 400 ba munisípiu Covalima atu distribui ba xefe família 300-resin iha postu administrativu Fatumean.

Konsellu Ministru aprova mós projetu rezolusaun Governu, atu renova impozisaun serka sanitária iha munisípiu Covalima, mantein bandu deslokasaun hosi munisípiu ne’e bá munisípiu seluk, hahú oras 00:00 iha loron 04 marsu 2021 no oras 23:59 iha loron 02 abríl 2021.

Iha kazu ne’e, Ministériu Interiór bele mós autoriza deslokasaun ema no sasán merkadoria, ho fundamentu razaun umanitária, nune’e bele halo protesaun saúde públika, seguransa públika no interese públiku, inklui define kondisaun saida maka hakarak realiza.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here