Komunidade Comoro-Dili, troka voucher Cesta Bázika iha supermerkadu Leader, kinta (10/12/20). Imajen Tatoli/António Gonçalves.

DILI, 02 marsu 2021 (TATOLI)—Governu liuhosi Ministériu Turizmu, Komérsiu no Indústria (MTKI) halo ona distribuisaun Cesta Bázika ho modalidade voucher ba abitante iha área urbana, munisípiu Dili.

Distribuisaun hahú iha novembru to’o dezembru 2020, estende to’o fevereiru 2021 no daudaun estende tan to’o 31 marsu tinan ne’e.

“Ami-nia parte distribuisaun Cesta Bázika ne’e atinje ona 50% tanba barak liu ami distribui iha Dili, ne’ebé fahe ho voucher, ema hili de’it, prosesu ne’e mós halo iha Ermera maibé tanba kondisaun udan difikulta prosesu distribuisaun,” Ministru Turizmu, Komérsiu no Indústria (MTKI), José Lucas do Carmo da Silva, informa iha Palásiu Governu, tersa ne’e.

Daudaun sei kontinua halo distribuisaun ba populasaun sira iha kapitál Dili no munisípiu Ermera.

Kona-ba pagamentu ba empreza distributór Cesta Bázika, iha ona prosesu atu halo pagamentu, maibé distributór sira ne’ebé seidauk hala’o serbisu laiha pagamentu.

“Ita-nia empreza sira ne’ebé hatama ona relatóriu iha hela prosesu atu halo pagamentu,” nia akresenta.

Entretantu, ministériu implementadór hanesan MTKI, Ministériu Agrikultura no Peska (MAP), Sekretariu Estadu Ambiente (SEA), Sekretáriu Estadu Kooperativa (SEKoop) no Sentru Lojíztika Nasionál (CLN, sigla Portugés) fahe ona Cesta Bázika iha territóriu tomak atinje ona 70%.

MTKI responsável ba distribuisaun Cesta Bázika ho modalidade voucher ba benefisiáriu hamutuk 287.770 iha postu administrativu haat iha munisípiu Dili no iha área urbana sira.

Loja sira ne’ebé mak fasilita voucher ba benefisíariu sira iha Dili hamutuk loja 15 hanesan Amigu To’os-nain, Loja agrikultór, Jacinto Supermarket, Lita Store, Lisun Supermarket, funan Buras, Acelda, Starking, May Mart, Fitun, W four, Maubara no seluk tan.

Programa Governu kurtu ba prazu iha ámbitu rekuperasaun ekonómika ne’e, nu’udar medida  restrisaun iha luta kontra surtu COVID-19, hodi salva no proteje funsionamentu ekonomia rai-laran.

Inisiativa ne’e ho objetivu hodi kria kondisaun liuhosi aumenta rendimentu  agrikultór,  inklui apoia família ho nesesidade bázika hodi kombate hamlaha liuhosi kontribuisaun ai-han ne’ebé iha nutrisaun ba uma-kain hotu iha Timór laran.

Iha fulan kotuk, ministériu implementadór distribui ona Cesta Bázika  ba populasaun hamutuk 900.000 no sei falta 595.000.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here