Deputadu Patrocínio dos Reis Fernandes. Imajen/Espesial.

DILI, 02 marsu 2021 (TATOLI)—Bankada Congresso Nacional de Reconstrução de Timorense (CNRT) deskonfia tentativa korrupsaun mosu iha Ministériu Transporte no Komunikasaun (MTK) tanba hasa’e folin aluga ró-ahi hosi rai-li’ur.

Transporte marítima nu’udar meiu transporte esensiál atu liga kapitál Díli ho Rejiaun Administrativa Oé-Cusse no Illa Ata’uro ba atividade ekonómiku, kultura no sosiál. Dependénsia populasaun rai-rua ne’e ba transporte marítima boot tebes tanba lokaliza iha rai-ketan no transporte terrestre iha ninia operasaun ba-mai impoin regra oioin.

Durante ne’e, Ró-Ahi Nakroma, Ró-Ahi Sukses mak normalmente hala’o sira-nia viajen entre Dili ba RAEOA no Dili Ataúro.

Konforme informasaun ne’ebé Bankada CNRT asesu deskobre indisíu forte korrupsaun iha Ministériu Transporte no Komunikasaun tanba iha orientasaun atu halais selebra kontratu hasa’e folin aluga Ró-Ahi ne’ebé atu mai hosi rai-li’ur.

“Informasaun ne’ebé Bankada CNRT rekolla katak, kompañia rua (2) submete kuotasaun ba Ministériu Transporte no Komunikasaun ho valór montante osan kada fulan ho folin osan rihun $150 no rihun $180,” Vise-Xefe Bankada CNRT, Deputadu Patrocínio Fernandes dos Reis, hato’o deklarasaun polítika ne’e liuhosi plenária, Parlamentu Nasionál, tersa ne’e.

Bankada CNRT esplika, hafoin simu tiha kuotasaun refere, ministériu orienta kedas APORTIL hodi prepara lalais kontratu ba kompañia ida oferese ho folin rihun $150 ne’e, maibé husu atu iha kontratu hasa’e nia folin ba rihun $220.

Nune’e mós husu atu selebrasaun kontratu ne’e halo de’it iha APORTIL, maibé to’o agora kontratu refere seidauk bele asina tanba APORTIL dúvida ho asuntu ne’e.

Bankada CNRT haree katak ministériu konsientemente envolve viola lei hodi benefísia ba nia interese privadu, deskonfia osan korrupsaun ne’e atu benefísia ba interese privadu no grupu.

Relasaun ho kestaun ida-ne’e, Bankada CNRT husu no ezije Comissão Antí Corrupsaun (CAC-sigla portugés) atu halo investigasaun ba Ministériu Transporte no Komunikasaun no APORTIL ne’ebé mak iha tentativa atu halo kontratu hodi fó prejuízu ba osan Estadu nian.

Bankada Opozisaun ne’e ezije Ministériu Públiku atu loke investigasaun lalais antes osan Estadu lakon, hodi hapara mós kontratu hotu-hotu relasaun ho Ró-Ahi hodi hein rezultadu investigasaun nian.

Husu Parlamentu Nasionál atu bolu Ministériu Transporte no Komunikasaun hodi esplika kona-ba kondisaun no situasaun Ró-Ahi Nakroma nian ne’ebé seidauk hatene loos fulan hira mak atu halao fali nia operasaun, no mós prosesu tomak ba selebrasaun kontratu no aluga Ró-Ahi hosi rai-li’ur ne’e.

“Ita hotu hatene, Ró-Ahi lubuk ida mak durante ne’e halo operasaun iha RAEOA no Ataúro no atende hela komunidade sira ho di’ak mesmu ké Ró-Ahi Nakroma la halo nia operasaun dezde fulan-dezembru tinan 2020.  Maibé, ita la komprende mak tanbasá Ministériu Transporte no Komunikasaun hakarak kontrata lalais Ró-Ahi seluk,” deklarasaun polítika hosi Bankada CNRT.

Bankada CNRT deskonfia katak mosu tentativa hodi aproveita podér hakna’ok osan Estadu nian ba interese privadu ka grupu. Iha situasaun COVID-19 ne’ebé Estadu mós seidauk selu divída barak, nusá maka osan sira-ne’e la uza ba ne’ebá.

Hatán ba kestaun nee, Deputadu Bankada Kmanek Haburas Unidade Nacional Timor Oan (KHUNTO), Luis Roberto, konsidera akuzasaun Bankada CNRT nian falsa.

“Ha’u foin telefone Ministru Transporte no Komunikasaun katak deklarasaun Bankada CNRT nian mamuk hela no laloos. Ita-boot sira kestiona ne’e kona-ba saida nian. Ministru hosi KHUNTO, tanba ne’e ami rejeita deklarasaun polítika ne’ebé laloos ne’e,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here