Ekipa Vizilánsia no Epidemolojia ho Laboratóriu Ministériu Saúde rekolla amostra screening masál ba abitante iha Sentru Esperansa ba Feto Salele, Covalima. Imajen Tatoli/Eugénio Pereira.

DILI, 02 marsu 2021 (TATOLI)—Koordenadór Forsa Tarefa ba Prevensaun no Mitigasaun Surtu COVID-19 (SS-CIGC), Rui Maria de Araújo, atualiza progressu atividade buka tuir kontaktu besik hosi ‘cluster’ aldeia Klauhalek no aldeia Onu Laran, iha munisípiu Covalima hatudu novidade di’ak.

Dadus hatudu novidade di’ak tanba hosi loron 22 fevereiru, hafoin deteta kazu pozitivu hosi amostra rastreiu seletivu em massa iha Fatumea, to’o horiseik 1 marsu, ekipa konjunta saúde, buka tuir kontaktu-besik sira ne’ebé pozitivu ho totál 278, na’in-ualu de’it mak pozitivu hamutuk ho na’in-rua pozitivu hosi rastreiu.

Notísia Relevante:Prevensaun COVID-19: Timor-Leste la’ós ona senáriu otimista

“Totál pozitivu ka kazu konfirmadu na’in-sanulu hanesan ita hatene ona,” Rui Maria de Araújo hateten liuhosi konferénsia imprensa iha Centro Convenções Dili (CCD), tersa ne’e.

Amostra 278 ne’e foti iha aldeia Klauhalek no aldeia Belulik Kraik iha Suku Belulik Leten, Fatumea, aldeia Onu laran, Suku Maudemu, Tilomar no mós Suai-Vila.

Oras ne’e daudaun, atividade buka tuir kontaktu-besik iha Tilomar sei la’o nafatin no ekipa konjunta    saúde iha Munisípiu Covalima, ohin halo mós rastreiu iha Postu Administrativu Maucatar ho Postu    Administrativu Zumalai.   

Rui Maria de Araújo mós aproveita oportunidade hodi atuliza ba públiku kona-bá atividade rastreiu seletivu em massa, ne’ebé hala’o hosi 16 to’o 25 fevereiru ho rezultadu mak hanesan Munisípiu Covalima totál amostra ne’ebé rekolla 1.372, rua  mak pozitivu (hanesan temi ona iha leten) no restu negativu hotu, inklui amostra 58 hosi Postu Fohorem no 365 hosi Postu Fatululik.

Iha Munisípiu Bobonaro totál amostra ne’ebé rekolla hamutuk 1.298, negativu hotu no Rejiaun Administrativa Espesiál Oe-cusse Ambeno (RAEOA) totál amostra ne’ebé rekolla hamutuk 1.078,  negativu hotu.

“Atividade rastreiu seletivu em massa sei nafatin hala’o iha Munisipiu Covalima no Bobonaro,” nia informa.

Kona-bá rezultadu vizilánsia sentinela iha territóriu tomak hatudu katak, iha fevereiru nia laran, fasilidade saúde-sira hanesan Sentru Saúde ho Ospitál Referénsia-sira iha rai-laran, rekolla amostra hamtuk 1.066 hosi ema ne’ebé vizita.

“Ida ne’ebé iha síntomas infesaun respiratória  aguda no mai konsulta ka baixa iha fasilidade-sira la iha    ida mak pozitivu COVID-19,” nia subliña.

Hosi atividade buka tuir kontaktu-besik ba kazu konfirmadu sira, hosi atividade rastreiu seletivu em   massa iha Munisípiu Covalima, Bobonaro, RAEOA, no mós atividade vizilánsia sentinela ne’ebé hala’o    iha rai-laran, médiku ne’e dehan, bele to’o iha konkluzaun katak hosi 22 to’o 26 fevereiru, deteta iha Munisípiu Covalima, transmisaun lokál hosi kazu primáriu ida, ne’ebé hada’et ba totál kazu sekundáriu na’in-hitu.   

“Hosi kazu sekundáriu na’in-hitu ne’e, ida mak hada’et tutan ba na’in-rua seluk,” Rui Araújo dehan tan.

Nune’e, médiku ne’e konsidera katak, hosi 27 fevereiru to’o ohin, seidauk deteta tan kazu foun iha Munisipiu Covalima, Bobonaro, RAEOA no nisípiu sira seluk, inklui Munisípiu Dili ne’ebé iha populasaun barak-liu iha Timor-Leste, seidauk iha evidénsia kona-bá transmisaun lokál.   

Ikusliu, dadus atuál ba loron ohin, kazu foun 0, kazu ativu 23, ema tama hosi fronteira terrestre hosi 1    to’o 28 fevereiru liu dalan regulár 39, liu dalan irregulár ne’ebé autoridade-sira deteta hamutuk na’in 51 no sira tama iha kuarentena.   

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here