Bee nalihun iha arredór eskola Ensinu Báziku Filiál 1,2 síklu Fatuhada. Imajen/facebook.

DILI, 01 marsu 2021 (TATOLI)—Bee sempre nalihun iha arredór eskola Ensinu Báziku Filiál (EBF) 1,2 síklu Fatuhada, tanba valeta kloot no la konsege akumula bee foer iha tempu udan.

Nune’e, udan boot ne’ebé akontese iha domingu 28 fevereiru, halo bee nalihun makaas to’o impede atividade ensinu aprendizazen ba estudante 1.316, iha segunda loron 1 fulan marsu.

Notísia Relevante:2021, Governu mellora sistema drenajen iha kapitál Dili

Koordenadór eskola, Zacarias da Conceição Mala, hateten konstrusaun eskola ne’e iha kedan rai kle’an no valeta mós kloot la konsege akumula bee foer ho volume boot, nune’e  bee tenke nalihun iha arredór eskola-nian.

Nia dehan, alende bee foer, arredór eskola ne’e mós nakonu ho lixu ne’ebé bee lori hamutuk iha tempu udan.

Ho situasaun ne’e, Zacarias hola desizaun hodi hapara atividade eskolár durante loron ida no hein to’o bee maran.

“Ita hapara atividade ensinu aprendizazen tanba kondisaun la permite, ita mós tauk orsida labarik sira bele moras tanba foer barak iha área ne’e. Kuandu bee maran ona ita bele kontinua atividade hanesan baibain,” Zacarias hateten ba jornalista Agência Tatoli, segunda ne’e.

Koordenadór ne’e mós informa katak, parte Serbisu Edukasaun Munisípiu Dili observa ona kondisaun eskola ne’e no hein intervensaun-ruma.

Eskola ne’e iha sala-de-aula 11 ho estudante 1.316 no profesór na’in 30 kompostu permanete na’in 24, kontratadu na’in-neen inklui seguransa na’in-ida.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here