Forsa Unidade Territoriál; UPF ho F-FDTL hala’o operasaun intensivu iha liña fronteira Munisípiu Covalima. Imajen TATOLI/Eugénio Pereira.

DILI, 01 marsu 2021 (TATOLI)–Sala Situasaun Sentru Integradu Jestaun Krize (CIGC, sigla portugés) halo analiza ba risku ne’ebé akontese iha ámbitu aplika serka sanitária iha munisípiu Bobonaro, Covalima inklui Rejiaun Administrativa Espesiál Oé-cusse Ambeno (RAEOA) no nota katak iha impaktu di’ak, maski limita movimentu komunidade.

“Hosi pontu vista Sala Situasaun, serka sanitária ein termu seguransa hanesan soke terapeutika ida ba populasaun ein jerál atubele hateten katak mekanizmu ne’e bele iha benefísiu ba saúde públika, maibé iha sorin seluk hosi pontu vista saúde bele prevene movimentu transmisaun lokál no bele deteta fatór prinsipál hosi transmisaun lokál,” Xefe Estadu Maiór Koordenadór CIGC, Komodoro Donaciano do Rosário da Costa Gomes ‘Pedro Klamar Fuik’, hateten bainhira halo aprezentasaun kona-ba medida prevensaun COVID-19 iha ámbitu diskusaun estensaun Estadu Emerjénsia (EE) da-11 iha Parlamentu Nasionál (PN), segunda ne’e.

Notísia relevante: Reuniaun KM: deside bandu deslokasaun munisípiu seluk bá Bobonaro-Covalima

Estudu no analiza risku ne’ebé mak Sala Situasaun halo kona-ba serka sanitária iha munisípiu Bobonaro no Covalima, haree ba pontu tolu hanesan serka sanitária, halo breve analiza ba kondisaun pozitivu no negativu, inklui pasajen ilegál.

“Analiza parte negativu, naturalmente bainhira aplika serka sanitária bele limita liberdade movimentu ne’ebé iha impaktu ekonómiku ba transporte, negósiu no abastesementu nesesidade primária, nune’e mós impaktu ba presu sasán importadu hosi Indonézia sei hapara,” nia esplika.

Atuál Diretór Institutu Defeza Nasionál (IDN) konsidera pasajen ilegál ein termu sikuritáriu relasiona liu ho kriminál no atividade ilísita ne’ebé bele kria oportunidade ba ema komete aktu ilísitu, enkantu ein termu saúde ema sira ne’e maka bele lori moras no bele hada’et ba komunidade hanesan daudaun pasajen ilegál ne’ebé akontetese iha suku Belulik Leten.

Tuir nia, fonte pasajen ilegál ne’e akontese tanba fatór kulturál, negósiu, presáriu ba sasán iha nasaun viziñu (Indonézia) baratu liu, nune’e mós fatór seluk hanesan estudante sira ne’ebé iha lisensa estadia hotu inklui razaun seluk tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here