Kondisaun edifísiu Edukasaun Pré-Eskolár (EPE) públiku iha aldeia Baura, Suku Leorema, Postu Administrativu Bazartete. Imajen/ Elisa Correia de Fátima.

DILI, 01 marsu 2021 (TATOLI)—Diretór Serbisu Edukasaun Munisípiu Liquiçá (DSEML), Zeto António, husu Ministériu Edukasaun Joventude no Desportu (MEJD), atu intervein lalais hodi reabilita edifísiu Edukasaun Pré-Eskolár (EPE) públiku iha aldeia Baura, suku Leorema, Postu Administrativu Bazartete.

Zeto António husu tanba edifísiu ne’e anin sobu iha domingu loron 21 fulan fevereiru, maibé to’o oras ne’e seidauk iha intervensaun ruma.

Notísia Relevante:Anin sobu edifísiu Pré-Eskolár Baura

“To’o agora seidauk hetan intervensaun direta hosi MEJD ho Planu Nasionál Dezenvolvimentu Suku (PNDS),” nia hateten ba jornalista Agência Tatoli via telefónika, segunda ne’e.

Nia informa katak, oras ne’e daudaun estudante-sira la hala’o atividade aprendizazen hanesan baibain tanba responsável edukasaun Postu administrativu Bazartete lakohi foti risku ho kondisaun edifísiu ne’ebé grave.

Tanba ne’e, estudante sira suspende hela atividade eskolár hodi hein reabilitasaun edifísiu mak bele kontinua hanesan baibain.

Nune’e mós Diretór Nasionál Asaun Sosiál Eskolár (DNASE), Joaquim Martins, hateten ekipa hosi diresaun ne’e halo ona observasaun direta ba edifísiu ne’e no rekoñese katak anin estraga duni, maibé PNDS nu’udár na’in ba projetu mak tenke halo intervensaun hodi foti desizaun.

“Ami ba haree ona kondisaun edifísiu, maibé ami labele foti direta desizaun tanba edifísiu ne’e PNDS mak halo. Tan ne’e parte MAE mak sei responsabiliza projetu ho-nia orsamentu,” nia hateten iha knaar fatin.

Diretór ne’e mós sei halo komunikasaun lalais ho parte PNDS atu bele buka alternativa-ruma hodi halo intervensaun lalais ba edifísiu ne’e.

Iha semana kotuk, Komisaun F ne’ebé trata Asuntu Edukasaun iha Parlamentu Nasionál (PN) halo ona fiskalizasaun ba fatin akontesimentu.

Atualmente iha estudante na’in 55 mak hala’o estudu iha Edukasaun Pré-Eskolár Baura no iha profesór kontratadu na’in-tolu.

 Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here