Fronteira terrestre Mota-Ain, Batugade, Imajen Tatoli/António Gonçalves.

DILI, 01 marsu 2021 (TATOLI)—Reprezentante Povu iha Uma Fukun Parlamentu Nasionál, husu Governu atividade kréditu ne’ebé hala’o hosi mikro-empreza sira iha fronteira tanba atividade ne’e mak obriga sidadaun sira tenke komete movimentasaun ilegál.

Notísia Relevante: PN husu MEJD suspende atividade eskolár iha Covalima

Deputadu Bankada FRETILIN, Silvino Moras, hateten movimentasaun ilegál iha fronteira la’ós tanba sasán nia folin ne’ebé barratu iha sorin (territóriu Indonézia).

“La’ós ida-ne’e. Kauza ne’e tanba komunidade sira-ne’ebé hela iha fronteira, sira iha asesu ba kréditu ba mikro-empreza sira-ne’ebé iha fronteira. Ho nune’e situasaun ne’e obriga tanba kada semana, sira tenke hatama sira-nia kréditu ne’e entaun oinsá Governu nia atuasaun ba situasaun ida-ne’e. Se lae, mikro-empreza hala’o nafatin sira-nia atividade kréditu iha fronteira,” nia levanta liuhosi debate estensaun Estadu Emerjénsia XI, iha plenária Parlamentu Nasionál, segunda ne’e.

Nia husu Governu suspende mós atividade sira-ne’e tanba komunidade laiha osan iha aplikasaun serka sanitaria ne’e.

Nune’e, Deputadu Bankada FRETILIN, Alexandrino Cardoso, hateten komunidade sira-ne’ebé asesu kréditu hosi banku no mikro-empreza hasoru situasaun defísil tanba laiha osan.

“Ita-nia maluk sira halo kréditu ne’ebé iha banku no mikro-empreza sira-ne’e, komunidade kada semana tenke fó no hatama osan (setoran).  Tanba, serka sanitária entaun komunidade sira laiha osan. Entaun, osan na’in kada loron ba dere odamatan hodi husu osan (tagihan). Kuitadu, sira atu hetan osan hosi ne’ebé. Ida-ne’e mak husu Governu atu buka dalan,” reprezentante povu ne’e rekomenda ba Governu.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here