Estudante Timoroan sira iha Indonézia, bainhira fila-fali mai liuhosi fronteira Batugade. Imajen TATOLI/Eugénio Pereira.

DILI, 01 marsu 2021 (TATOLI)—Reprezentante Povu iha uma fukun Parlamentu Nasionál rekomenda ba Ministériu Negósiu Estranjeiru no Kooperasaun (MNEK) no Ministériu Justisa (MJ) atu foti medida hodi fó solusaun ba problema estudante Timoroan sira-ne’ebé oras ne’e hala’o estudu iha Indonézia tanba pasaporte mate.

“Ha’u husu ba Ministériu Negósiu Estranjeiru no Kooperasaun no Ministériu Justisa, medida saida mak atu prevene sidadaun (estudante Timoroan) sira iha Indonézia tanba Kitas no pasaporte mate. Ida-ne’e mak halo sira-nia situasaun la seguru atu hela iha Indonézia,” Xefe Bankada Partidu Demokrátiku (PD), Deputadu António da Conceição, levanta liuhosi debate estensaun Estadu Emerjénsia XI, iha plenária Parlamentu Nasionál, segunda ne’e.

Eis Ministru Edukasaun ne’e haktuir, situasaun sira iha interiór bainhira pasaporte mate bele halo iha-ne’e hafoin enkamiña fila-fali ba estudante sira iha Indonézia atu bele kontinua estudu.

“Maibé ikus ne’e dehan buat hotu-hotu tenke fila mai Timor, laiha dalan atu fasilita estudante sira-nia vida, enkuantu ita hakarak trava moras ne’e labele tama Timor. Ha’u hein resposta ida hosi señora Ministra Negósiu Estranjeiru no Kooperasaun no Ministru Justisa,” Eis Ministru Komérsiu, Indústria no Ambiente ne’e fó hanoin ba Governu.

Enterantu, Deputadu Abel Pires mós preokupa ho estudante Timoroan sira-ne’ebé oras ne’e hala’o estudu iha Indonézia tanba ema mate ba COVID-19 kontinua aumenta maibé sira-nia dokumentu hanesan pasaporte mate ona.

“Se sira-nia pasaporte mate no sira labele fila mai hodi hafoun, tanba viajen ne’e risku no karun, ita-nia fronteira taka hela. Se situasaun hanesan ne’e entaun Ministériu Justisa tenke hamosu solusaun ida-ne’ebé kreativu. Katak, bele simu aplikasaun ne’e liuhosi email de’it, naran katak hetan verifikasaun hosi ita-nia embaixada iha-ne’ebá, ne’e natón ona” Deputadu Bankada Partidu Libertasaun Populár ne’e rekomenda ba Governu.

Nia hatutan, ho situasaun propagasaun surtu COVID-19 labele atende ho situasaun manuál.

“Se hosi email (karta eletrónika) labele ona entaun ita mak tenke haruka ofisiál ba para haree situasaun ne’e tanba estudante sira mai bele lori situasaun defísil liután,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here