Enkontru virtuál MF-membru PSC hodi implementa projetu janela únika nasionál, iha salaun MF, Aitarak-laran. Imajen/Mídia MF

DILI, 01 marsu 2021 (TATOLI)–Vise-Ministra Finansa, Sara Lobo Brites, akompaña hosi membru Project Steering Committee (PSC), lidera enkontru virtuál ho Koordenadora Programa ASYCUDA/UNCTAD ba rejiaun Ázia, Marianne Dumont, hodi ko’alia kona-ba implementasaun projetu janela únika nasionál.

Tuir nota ne’ebé Agência TATOLI asesu, enkontru virtuál ba daruak ne’e, diskute kona-ba progresu implementasaun sistema janela únika nasionál (NSW-National Single Window).

Iha enkontru ne’e, membru PSC diskute kona-ba planu ne’ebé sei implementa durante tinan-rua nia laran, ne’ebé fahe ba faze rua hanesan interkoneksaun hosi ajénsia Governu hamutuk na’in-ualu inklui mós kompañia Bolloré ne’ebé mak iha futuru sei sai operadór ba Portu Baía Tibar. 

Nune’e mós, interligasaun ho nasaun sira ne’ebé durante ne’e sai parseiru komérsiu ba Timor-Leste inkui nasaun membru Komunidade País Lian Portugés (CPLP, sigla portugés) no Asosiasaun Nasaun Sudeste Aziátiku (ASEAN).

Janela únika hanesan projetu importante ida ba Autoridade Aduaneira (AA)/Alfándega no Ministériu Finansa (MF) iha ámbitu programa reforma fiskál no jestaun finánsa públika, ne’ebé mak inisia hosi VI no VIII Governu, ne’ebé komprometidu atu kontinua promove ajenda reforma ne’e.

Tanba ne’e, liuhosi enkontru virtuál hanesan oportunidade ida ba AA no MF inklui ekipa UNCTAD, hodi diskute dezenvolvimentu sistema ASYCUDA World no mós plataforma janela únika hodi atualiza progresu serbisu no diskute mós problema  relasiona ho implementasaun programa refere.

Durante enkontru ne’e, membru PSC informa ba Vise-Ministra Sara katak iha tempu badak nia laran, ajénsia sira iha Diresaun Nasionál Transporte Terrestre (DNTT), Kuarentena, Imigrasaun no Saúde mós sei integra ba sistema janela únika ASYCUDA World.

Sistema ne’e opera iha portál online, ne’ebé mak administra hosi Alfándega no MF rasik. 

Portál ne’e liga hosi Alfándega ho liña ministeriál, ajénsia no institutu públiku Governu ne’ebé mak trata movimentu ema no sasán sira, inklui Autoridade Tributária, Imigrasaun, Kuarantena, Ministériu Saúde, Ministériu Transporte no Telekomunikasaun (MTK), Ministériu Turizmu, Komérsiu no Indústria (MTKI), TradeInvest no Autoridade Portuáriu Timor-Leste (APORTIL).

Ida-ne’e hatudu liuhosi integrasaun ajénsia TradeInvest ba iha sistema ASYCUDA World ne’ebé foin lalais ne’e, Ministru Koordenadór Asuntu Ekonómiku, Joaquim Amaral no Ministru Finansa, Rui Augusto Gomes, lansa ona iha 01 fevereiru 2021.

Utilizasaun sistema ne’e,  sei minimiza uzu surat-tahan, redús atrazu, kustu tranzasaun inklui tempu libertasaun sásan iha fronteira terrestre, portu no aeroportu, nune’e fasilita liután empreza sira atu halo negósiu. 

Sistema ne’e mós sei ajuda Governu liuhosi MF atu rekolla reseita ho maneira ne’ebé justu no transparente.

Enkontru ne’e, akompaña mós hosi Diretór Jerál AA/Alfándega, José Abílio ho ekipa, Diretór Jerál Servisu Korporativu MF, Joanico Pinto, Diretór Jerál IFMISU, Venceslau Guterres, Asesór Jurídiku, Isaac Menezes no Saeid Yarandi, inklui Espesialista Rezidente ASYCUDA iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here