Abertura formasaun CEFTEC iha sala auditóriu Muzeu Rezisténsia, segunda (01/03). Imajen TATOLI/Natalino Costa

DILI, 01 marsu 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, loke formasaun iha Sentru Formasaun Téknika Komunikasaun (CEFTEC, sigla portugés) ba tinan 2021 nian, ne’ebé sei partisipa hosi formandu na’in-220 hosi instituisaun oin-oin.

Formasaun ne’ebé oferese maka hanesan multimédia, hakerek imprensa, rádiu, televizaun, hakerek jornalizmu ba lian tetun no portugés, jestaun komunikasaun krize no protokolu.

Iha biban ne’e, governante ne’e enkoraja formandu sira hodi aproveita tempu ho di’ak atu aprende.

“Tempu agora ema buka aprende hodi hariku koñesimentu ba kualkér oportunidade ne’ebé maka iha, nune’e bele benefisia ba an rasik no ba ema seluk iha futuru. Tanba ne’e, husu ba sira ne’ebé hetan oportunidade tuir formasaun iha CEFTEC, tenke aprende ho di’ak atubele hanorin filafali ema seluk,” Sekretáriu Estadu Akara tenik iha sala auditóriu Muzeu Rezisténsia, segunda ne’e.

Nia husu ba jornalista sira, aproveita formasaun ho di’ak hodi hasa’e koñesimentu iha hakerek,  nune’e bele hadi’a produtu jornalístiku.

“Husu ba jornalista sira ne’ebé tuir formasaun, aprende didi’ak hodi hadi’a produtu jornalístiku sira, se lae ita hakerek sala hela de’it,” nia akresenta.

Iha oportunidade ne’e, Sekretáriu Estadu apresia CEFTEC nia vizaun ne’ebé atu transforma ba instituisaun formasaun jornalizmu.

Iha fatin hanesan, Diretór CEFTEC, Luís Evaristo, hateten formasaun tinan ne’e sei liu faze rejistrasaun, selesaun no diagnóstika.

“Iha rejistrasaun ami simu ema pur volta 500, no hosi hirak ne’e ami halo selesaun ba ema na’in-300-resin, to’o faze diagnóstika hili na’in-220 maka tuir formasaun iha CEFTEC,” nia informa.

Nia dehan, formandu ne’ebé admitidu hosi funsionáriu instituisaun Estadu, privadu no estudante finalista universitáriu.

Jornalista: Natalino Costa

Editora: Julia Chatarina

PUBLISIDADEiklan

1 KOMENTÁRIU

HAKEREK NO HATÁN

Please enter your comment!
Please enter your name here