Diretór Ezekutivu PERMATIL, Ego Lemos. Imaen TATOLI/António Gonçalves

DILI, 01 marsu 2021 (TATOLI)Diretór Ezekutivu Permakultura Timor-Leste (PERMATIL), Ego Lemos, hateten durante ezisténsia iha Timor-Leste, konsege kontribui ona buat balun ba Governu.

”Durante ezisténsia iha tinan 20 nia laran, PERMATIL konsege halo advokasia hodi hatama programa to’os eskolar ba kuríkulu nasionál, ne’ebé agora sai ona matéria ba arte no kultura, ne’ebé tulun ona Ministériu Edukasaun, Juventude no Desportu halo ona to’os eskolár hanesan laboratóriu ba kada eskola, liu-liu eskola primária sira,” Diretór PERMATIL informa ba Agência TATOLI via telefónika, segunda ne’e.

Seluk maka durante ne’e organizasaun naun governamentál ne’e konsege ajuda Governu solusiona problema fonesimentu bee ba komunidade.

“Ami la’ós ba dada bee, maibé hamutuk ho komunidade halo konservasaun bee, liu-liu iha área ne’ebé maka durante ne’e tempu bai-loron bee matan sira menus to’o maran,” nia akresenta.

Ho intervensaun PERMATIL maka konsege hamosu bee matan lubuk ida no agora daudaun ekipa organizasaun ne’e halo hela intervensauun ba fatin besik 200 iha territóriu laran tomak.

Maski nune’e, Responsável ne’e esplika, dezafiu ne’ebé maka foin daudaun hasoru maka komunidade seidauk komprende serbisu PERMATIL bainhira ekipa tuun ba terrenu iha povu sira-nia le’et.

“Komunidade sira bain-bain halo ona serbisu rurál, ne’ebé sira ladún interese ho serbisu PERMATIL ba konservsaun bee nian. Entaun bainhira kuandu ekipa tama iha sira-nia suku, sira sempre hanoin ne’e hanesan projeitu boot ida, entaun sira espera katak ita tenke selu atu sira halo konservasaun ba bee matan rasik,” nia hatutan.

Nia dehan, la’ós ba iha komunidade de’it maibé hosi parte Governu seidauk komprende didi’ak serbisu PERMATIL.

Maske nune’e,  organizasaun ne’e kontinua serbisu hamutuk ho Governu inkui ajénsia internasionál hanesan Uniaun Europeia, UNDP no UNICEF hodi ba vizita fatin konservasaun ne’ebé maka PERMATIL hamutuk ho komunidade halo hanesan iha Dare foin daudaun.

“Ami kontinua koopera ho autoridade lokál, igreja, lia-na’in no komunidade, nune’e bele fó susesu ba ami-nia serbisu konservsaunn bee matan sira hodi kontinua eziste ba komunidade no sira labele halerik ba bee,” nia tenik.

Enkuantu daudaun ne’e, PERMATIL iha rekursu na’in-17 ne’ebé durante ne’e halo hela serbisu inklui voluntáriu na’in-50-resin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here