Ilustrasaun vasina COVID-19. Imajen/Espesiál

DILI, 28 fevereiru 2021 (TATOLI)—Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste hosi Sala Situasaun Sentru Integradu Jetaun Krize (CIGC, sigla portugés), Rui Maria de Araújo, hateten daudaun ne’e Governu hamutuk ho parseiru dezenvolvimentu sira esforsu hela atu asesu vasina ba prevensaun COVID-19.

“Vasina ne’e signifika hatama vírus iha forma seluk ida, la’ós forma ida ativu tebes, maibé forma ida sufisiente atubele iha imunidade ka defeza hasoru moras. Ema dehan vasina ne’e hanesan biru, bainhira ema atu ba funu lori biru atu defende sira-nia an ba kilat musan, iha kazu ne’e vasina mós hanesan,” Koodenadór informa liuhosi Konferénsia Imprensa iha Sentru Konvesaun Dili (CCD, sigla portugés),domingu ne’e.

Tuir nia, tuir loloos vasina asesu uluk ona atu halo vasinasaun, molok vírus afetadu ba sidadaun sira-nia le’et, tanba vasina ne’e ajuda ema-nia isin responde hasoru vírus.

“Ita vasina antes di’ak liu, maibé infelizmente vasina ita labele asesu lalais tanba ita la prodús iha Timor-Leste no daudaun ne’e país barak hadau malu atu hetan asesu ba vasina no ita-nia Governu no parseiru dezenvolvimentu esforsu atu asesu ba vasina ne’e,” nia akresenta.

Notísia relevante: KM aprova planu vasinasaun kontra COVID-19

Iha loron 15, Ezekutivu sira aprova ona projetu Rezolusaun Governu kona-ba planu nasionál vasinasaun COVID-19.

Planu nasionál ne’e, lidera hosi Vise-Primeiru Ministru no Ministra Solidaridade Sosiál no Inkluzasaun, Armanda Berta dos Santos, hamutuk ho Komisaun Interministeriál ba elaborasaun.

Koordenadór Forsa-Tarefa husu populasaun bainhira vasina ne’e mai labele iha dúvida tanba vasina ne’e bele solusiona ho forma di’ak liu hasoru moras COVID-19.

Governu hahú esforsu, nune’e iha tempu badak vasina bele to’o mai iha Timor-Leste.

“Ita hein katak bele realiza tanba Governu liuhosi Ministériu Saúde deside ona prioridade sira, maibé ita mós tenke rekoñese katak prosesu atu hetan asesu ba vasina ne’e la’ós fásil,” nia hatutan.

Organizasaun Saúde Mundiál (OMS) rekomenda ona Governu Timor-Leste katak vasina di’ak liu mak vasina AstraZeneca, tanba konsidera vasina ne’e seguru no efikáz ba kondisaun nesesáriu hanesan armazenamentu no refrijerasaun entre grau rua sentígraun no graun sentígradu ualu.

Iha sorin seluk, Timor-Leste adere ona ba mekanizmu COVAX Facility, ne’ebé 20% populasaun sei asesu gratuita vasinasaun kontra COVID-19.

“Ita-nia parseiru dezenvolvimentu sira hanesan OMS, Austrália, UNICEF no seluk tan mak hakarak apoia ita atu asesu ba vasina ne’e,” nia tenik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here