Benefisiáriu Mesquita T. da Costa. Imajen TATOLI/Domingos Piedade Freitas.

DILI, 28 fevereiru 2021 (TATOLI)—Populasaun Aldeia Kakeu Laran, Suku Becora, Postu Administrativu Cristo Rei, Munisípiu Díli, sente kontente ho atribuisaun programa Cesta Bázika hosi Governu.

Notísia Relevante: Ministériu implementadór asina despaisu estende Cesta Bázika to’o 31 marsu

Benefisiáriu Mesquita T. da Costa hateten, nia parte kontente tanba iha atribuisaun programa Cesta Bázika ne’e Governu bele fahe ai-han hanesan produtu lokál inklui sasán nesesidade bázika sira seluk tan.

“Ha’u sente kontente tebe-tebes ho atribuisaun programa Cesta Bázika, tanba bele fahe aihan hanesan produtu lokál inklui mós sasán sira seluk ba ami populasaun Aldeia Kakeu Laran. Sasán sira-ne’ebé mak ami populasaun sira simu mak hanesan kafe, masin-midar, masin, talas, mina, masin, susu-been, manu broiler, fós-rai kilo lima, batar u’ut kilo rua, forkeli kilo rua no selu-seluk tan,” benefisiariu Mesquita T. da Costa ba Agênsia Tatoli, hafoin ramata fahe no simu sasán Cesta Bázika, iha Becora, sábadu ne’e.

Nia dehan, maske esforsu Governu liuhosi kompañia sira hodi fahe sasán la’o neineik maibé ikus mai esforsu Governu nian liuhosi programa Cesta Bázika to’o duni iha povu nia liman.

“Maske atribuisaun sasán cesta bázika ne’e tarde maibé to’o ikus sasán no ai-han cesta bázika sira-ne’e, bele to’o iha ami povu sira-nia liman. Governu bele ajuda ona ami povu atu bele hatutan moris ho sasán cesta bázika sira-ne’e,” nia dehan.

Notísia Relevante: Implementasaun Cesta Bázika atinje ona 62,31%

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here