Tempu serka sanitária iha Covalima. Imajen TATOLI/Eugénio Pereira

DILI, 28 fevereiru 2021 (TATOLI)–Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, hosi Sala Situasaun Sentru Integradu Jestaun Krize (CIGC, sigla portugés), Rui Maria de Araújo, hateten Governu liuhosi Ministériu Solidaridade Sosiál no Inkluzasaun (MSSI) no Ministériu Koordenadór Asuntu Ekonómiku (MKAE) fó ona apoiu umanitáriu ba abitante sira iha munisípiu Covalima no Bobonaro.

“Prosesu apoia umanitáriu ne’e la’o ona, horikalan ami iha Sala Situasaun iha reniaun liuhosi Zoom, ne’ebé Autoridade munisípiu Bobonaro no Covalima hamutuk ho ekipa saúde sira hateten nesesidade bázika to’o ona no atu halo distribuisaun ba abitante sira,” Koodenadór ne’e infroma liuhosi Konférensia Impresa iha Sentru Konvensaun Dili (CCD, sigla portugés), domingu ne’e.

Foos saka 400 hosi Sentru Lojistika Nasionál (CLN, sigla portugés) maka daudaun iha ona munisípiu Covalima, enkuantu iha munisípiu Bobonaro seidauk konfirma ninia kuantidade.

“Autoridade sira sei organiza hela atu lori ba populasaun iha postu administrativu fatumean,” nia akresenta.

Distribuisaun foos sei bazeia ba númeru abitante, tanba la’ós distribui de’it ba munisípiu rua ne’e, maibé distribui mós ba munisípiu seluk, tanba CLN iha ona mapa atu halo distribuisaun no intervensaun merkadu.

Iha 15 fevereiru, Konsellu Ministru deside halo serka sanitária iha munisípiu Covalima no Bobonaro, hahú loron tuir mai hafoin desizaun ne’e sai (16/02) to’o 23:59 loron 03 marsu 2021.

Minisípiu Covalima, kompostu hosi postu administrativu Fatululik, Fatumean, Fohorem, Maucatar, Suai, Tiliomar no Zumalai, ho totál populasaun 65.301 hosi uma-kain 12.564 (sensus 2015).

Enkuantu, munisípiu Bobonaro, kompostu hosi postu administrativu Atabae, Balibo, Bobonaro, Cailaco, Lolotoe no Maliana, ho totál populasaun 97.762 hosi uma-kain 17.635 (sensus 2015).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here