Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, hosi Sala Situasaun CIGC, Rui Maria de Araújo. Imajen TATOLI/Egas Cristovão

DILI, 28 fevereiru 2021 (TATOLI)—Ministériu Saúde (MS) liuhosi Sala Situasaun Sentru Integradu Jestaun Krize (CICG, sigla Portugés), hahú hosi rejista kazu dahuluk to’o agora seidauk identifika sintoma grave liu ba ema hirak ne’ebé konfirmadu pozitivu COVID-19.

“Kuaze iha kazu konfirmadu pozitivu COVID-19 hamutuk 100-resin, hafoin tama  izolmentu sintoma grave liu ne’e laiha, maibé iha de’it maka ho sintoma moderadu ne’ebé hatudu mear no isin manas maka’as no iis sa’e oituan, maibé bainhira deskansa didi’ak ona, la ba a’at to’o ikus mai bele rekuperadu,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, hosi Sala Situasaun CIGC, Rui Maria de Araújo, informa liuhosi konferénsia impresa iha Sentru Konvensaun Dili (CCD, sigla Portugés), domingu ne’e.

Notísia relevante: MS rejista tan ema rua pozitivu COVID-19, pasiente ida rekuperadu

Hahú hosi Timor-Leste rejista kazu COVID-19 dahuluk iha marsu 2020 to’o agora, totál kazu konfirmadu hamutuk 113, ne’ebé maioria importadu hosi nasaun viziñu Indonézia, númeru rekuperadu hamutuk 94, kazu ativu 23 (inklui pozitivu 2 ohin loron) no seidauk rejista ema mate.

Tuir Koordenadór, kazu konfirmadu hotu ne’ebé baixa iha sala izolamentu Vera Crus maioria laiha sintoma surtu COVID-19, maski iha teste hatudu pozitivu.

Ho kondisaun hirak ne’e maka bele fó risku ba komunidade tanba ema ida infetadu COVID-19, maibé laiha sintoma hodi ema hanoin katak nia la moras maibé vírus ne’e iha hela.

“Kuandu laiha sintoma mak ita la deteta, signifika nia la’o bá-mai hela no posibilidade hada’et ba ema seluk ne’e iha,” nia akresenta.

Nune’e, Governu hahú deside atu halo teste masál liuhosi swab hodi foti amostra atu analiza iha laboratóriu.

“Ita kontinua apela ba populasaun tomak favór tuur hakmatek iha idaidak nia fatin, lalika la’o bá-mai lai, fó tempu atu ekipa saúde buka tuir kontaktu besik sira hotu no foti tan amostra hodi bele halo teste,” nia fó hanoin.

Nune’e mós, MS no CIGC enkoraja populasaun tomak, atu nafatin matan-moris ne’on na’in no kontinua prátika nafatin medida uza maskára, fase liman beibeik ho sabaun ka dezinfetante ruma, bainhira kumprimenta malu, la presiza ka’er liman, bensa-liman, rei-malu ka haku’ak malu no evita halibur malu barak inklui  hamriik ka tuur dook hosi ema seluk ho distánsia mínimu metru ida ho balun hodi prevene surtu COVID-19.

To’o oras ne’e, ekipa saúde halo ona teste ba ema 21.323 no hosi totál ne’e na’in-21.013 ho rezultadu negativu, enkuantu 197 hein hela rezultadu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here