Avo Beremau faan Pete hale'u Sidade Dili. Imajen TATOLI/Arminda Fonseca.

DILI, 28 fevereiru 2021(TATOLI)–Hei oan doben sira/respeita inan-aman bá/Tanba sira mak fó moris ne’e bá ó//Hei oan doben sira hamta’uk inan-aman bá/Tanba sira mak haki’ak ó to’o boot//.

La iha oan ida selu inan-aman nia kolen/Laiha oan ida selu inan-aman nia favor/Hanesan tasi luan, lalehan aas bá/Inan-aman nia kolen sura labele/Inan-aman nia favor tetu labele/Inan-aman nia kolen Maromak mak selu//.

Ne’e mak knananuk husi kompozitór timoroan Mario Miguel; dedika ba oan sira hotu kona-ba domin inan-aman ba oan sira. Nu’udar sinál reflesaun ida. Nu’udar valór moris ida-nian, ba oan sira hotu; banati no kumpre iha moris lorloron. Basá, inan-aman sira hadomi oan sira sein razaun. Basá, inan-aman sira sakrifika aan ba oan sira sein suspirasaun. Domin inan-aman ba oan sira la iha rohan. Realidade ida mak hanesan Avó Beremau halo ba oan sira.

Iha otas nakaras (idade 60), envez hakmatek hodi goza nia moris iha uma nu’udar idade avansadu ida maibé tanba oan sira-nia moris, maibé tanba nesesidade ida, nia sei gasta nia enerjia no kbiit tomak hodi luta ba oan sira-nia moris. La sura kolen. La suspira.

“Ha’u hahú fa’an dezde uluk kedas, Indonézia nia tempu até agora. Sasan ne’ebé fa’an ne’e mak Peté,” Avó Beremau haktuir kona-ba nia moris, bainhira dadalia ho jornalista TATOLI iha Colmera, Dili, besik Loja Pateo, foin lalais ne’e. 

Tuir Avó Beremau, Pete ne’ebé nia fa’an hodi sustenta família no eduka oan sira sosa tutan husi ema seluk, haat $5.

“Fa’an husi dader to’o lorokraik hetan $10,” nia dehan.

Tuir Avó Beremau, fa’an Pete, dader-dader la’o ain husi Becora to’o iha Comoro, depois fila husi Comoro mai hamriik iha Pateo Colmera hodi fa’an.

“Iha ne’e, iha fatin ne’e, to’o lorokraik mak foin la’o ain fali husi Pateo Colmera fila fali ba Becora,” nia haktuir.

Bainhira entrevista ho TATOLI, besik loja Pateo, maizmenus tuku 10 liu, Avó Beremau tuur sadere hela iha parede antigu edifísiu SAPT (Sociedade Agricultura Pátria de Timor) nian, tau faru-metan haklilik hela pasta koloridu ki’ik ida hateke ba luron parte Colmera nian hamutuk ho nia pete be tara iha aileba, hein hela ema atu hola maibé seidauk folin.

Iha dada-lia ne’e, ho oin muron no neon susar, Avó Beremau haktuir kona-ba nia moris. Katak, Osan sira ne’ebe nia mak hetan ne’e hodi sustenta fali familia uma-laran no haruka nia oan sira ba eskola.

“Rezultadu faan ne’e, lori sosa oan sira-nia presiza hanesan kadernu, livru, lapizera no roupa ba eskola nian,” nia dehan ho oin midar.

Avó Beremau, agora daudaun hela iha Has-Laran, Becora, Postu Administrativu Cristo Rei, Munisípiu Dili. Avó Beremau iha oan na’in haat; feto rua, mane rua.

“Ha’u-nia oan ida mak agora tuur ona iha banku sekundária no tolu sei tuur iha banku pre-sekundária (ensinu báziku),” nia dehan.

Pete nu’udar ai-horis anuál trópiku. Pete ne’ebé fresku bele haan ka bele da’an mós. Pete nia hun, nia altura maizmenus 20m no ladun iha sanak.

Klasifikasaun sientífika
Reinu: Plantae
Divizaun: Magnoliophyta
Klase: Magnoliopsida
Ordo: Fabales
Família: Fabaceae
Subfamília: Mimosoideae
Jéniu: Parkia
Espésie: P. speciosa

Naran binomial
Parkia speciosa.

Jornalista: Arminda Fonseca

Editór: Cancio Ximenes

 

 

HAKEREK NO HATÁN

Please enter your comment!
Please enter your name here