Estrutura Klibur Tane-Aas Obra Xanana Gusmão munisípiu Likisá no nasionál, hala'o konferénsia hodi apoiu Xanana Gusmão kompete iha eleisaun prezidensiál 2022-2027. Imajen TATOLI/Evaristo Soares Martins.

LIKISÁ, 28 fevereiru 2021 (TATOLI) – Klibur Tane-aas Obra Xanana Gusmão (KTOXG), kompromete kontinua dignifika obra líder karismátiku, eis Prezidente Repúblika, José Alexandre Kay Rala Xanana Gusmão.

“Hodi hatuur loloos Maun Boot-nian mehi no fó konfiansa tomak hodi hadi’a buat hotu iha Estadu direitu demokrátiku ida-ne’e tuir nia mehi loloos”, koordenadór klibur munisípiu Likisá, Calisto dos Santos Oliveira ‘Kdalak’, hatete liuhosi konferénsia imprensa hafoin halo konsolidasaun ba apoiante sira hosi klibur ne’e iha aldeia Kamelara, suku Dato, postu administrativu Likisá, munisípiu Likisá, domingu ne’e.

Nia dehan, ezisténsia klibur ne’e la haree ba kór partidu, tanba membru klibur hosi partidu oin-oin. “Ha’u ho ha’u-nia maun ‘Susar’ ne’ebé iha-ne’e halo ona konsultasaun ho Maun Boot, tan ne’e ohin ami halo deklarasaun iha rai Likisá”, afirma.

Konsolidasaun ne’ebé halo, partisipa hosi konselleiru másimu KTOXG, Amaro da Costa ‘Susar’ no estrutura nasionál hosi klibur ne’e.

Nia hatutan, Abilío Mesquita Mausoko ‘Dalas’ mós haruka nia reprezentante hamutuk ho organizasaun ne’e hodi fó apoia tomak Xanana Gusmão kandidata ba eleisaun prezidensiál 2022.

Tuir lei númeru 8/2011, 22 juñu, alterasaun daruak ba lei númeru 7/2006, 28 dezembru, lei eleitorál ba Prezidente Repúblika iha artigu 15 hatete; (As candidaturas são apresentadas por um número mínimo de cinco mil cidadãos eleitores de todos os distritos, não podendo qualquer deles ser representado por menos de cem proponentes).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here