Diretór Asia Justice and Rights (AJAR), José Luis Oliveira, hasai foto hamutuk ho partisipante sira semináriu kona-ba direitu umanu iha Salaun Sentru Nasionál Chega (CNC), Balide, Dili, sábadu (27/02). Imajen Tatoli/ Arminda Fonseca

DILI, 27 fevereiru 2021 (TATOLI)- Interfaith Cooperation Forum Timor-Leste, (ICF-TL), sábadu ne’e, hala’o semináriu ho objetivu hodi sensibiliza informasaun kona-ba direitu umanu no importánsia hosi inkluzaun ba juventude. Nune’e, juventude  sira bele komprende no hatene loloos direitu saida mak umanu.

Koordenadór ICF-TL, Nogueiro Mendes, informa dala barak ema koalia no hatene direitu umanu ne’e halai liubá ema ida-idak nia direitu,  maibé ladún komprende di’ak substánsia hosi direitu umanu.

Notísia Relevante : Governu Mós Iha Polítika Protesaun ba Komunidade LGBTI

“Ami halo semináriu ne’e hakarak fahe mós oportunidade ba maluk sira atu hatene loloos direitu umanu, maske sira hatene la’ós 100%  atu halo mudansa kedas ba buat hotu, maibé neineik ita espera katak sira komprende kona-ba direitu umanu ne’e rasik,” Nogueiro Mendes, hateten ba jornalista iha Salaun Sentru Nasionál Chega (CNC), Antigu Komarka Balide, Dili.

Nia argumenta, dalaruma joven barak ne’ebé mak sempre la respeitu ema seluk nia direitu tanba sira menus informasaun, nune’e hamosu dezentendimentu.

Diretór Asia Justice and  Rights (AJAR), José Luis Oliveira, ne’ebé sai orador prinsipál iha semináriu ne’ebé lori temátiku “Advokasia ba direitu umanu” hateten, kona-ba direitu umanu ne’e ko’alia loloos katak ema-nia liberdade no nesesidade báziku.

Nia afirma, direitu umanu ne’e iha elementu rua ne’ebé mak liberdade no nesesidade báziku, maibé direitu loloos ne’e mak nesesidade báziku.

“Direitu umanu kona-ba ita ema-nia liberdade ho nesesidade báziku, maibé ita tenke komprende didi’ak liberdade ne’e la’ós libertinajen tanba liberdade ne’e direitu no libertinajen liberdade ne’ebé laiha limite, ka kontra violasaun  no Krime,” José Luis Oliveira esplika.

Nia dehan, dala barak ema halo konfuzaun direitu umanu ne’e kahur hotu ho direitu baibain, no konsidera hanesan libertinajen ne’ebé laiha limitasaun maibé liberdade ne’e mak direitu umanu ne’e.

“Ha’u-nia liberdade mak espresaun, atu ko’alia halo asosiasaun no halibur ha’u-nia maluk sira, maibé liberdade laiha limite no kontra ema seluk nia direitu ne’e la’ós direitu umanu,” nia afirma.

Iha fatin hanesan, Koordenadora Arcoiris Timor-Leste, Bella Galhos, ne’ebé lori temátiku kona-ba “importánsia hosi inkluzaun sosiál” liga ho Lesbi, gay, bisexual, transgender,  intersex (LGBTI) hateten, ko’alia kona-ba sosiedade ne’ebé mais eskluzivu labele husik ema ida iha kotuk tanba komunidade ne’e foin-sa’e mak barak ne’ebé sira presiza merese hetan oportunidade, rekursu no edukasaun ne’ebé hanesan.

“Ha’u hanoin ko’alia kona-ba direitu umanu, ita ko’alia ba ema, entaun ema mai ho kondisaun oi-oin, hanesan defisiente, normal  no  inklui Lesbi, gay, bisexual, transgender,  intersex (LGBTI), sira ne’e moris ho identidade ne’ebé seksu ida lala’ok ida ne’e la’ós sira-nia hakarak maibé moris ho kondisaun nune’e kedas,” nia hateten.

Nia dehan, Komunidade LGBTI, baibain sosiedade rona liafuan ne’e haksoit liubá hanoin feto-rua kaben no mane-rua kaben, maibé kestaun  la’ós mak ida-ne’e, maibé ko’alia kona-ba fundamentu direitu umanu komunidade LGBTI nian katak labarik barak mak moris mai ema barak la komprende hanoin sira tenta aan sai feto ka mane hosi ne’e dala barak ema diskrimina entaun ida ne’e mak komunidade LGBTI nia luta.

Nia dehan, dala barak iha família balu iha oan ka alin ne’ebé nia seksu no halalok han malu entaun sira halo asaun fíziku hasoru no baku halo violasaun seksuál hasoru entaun LGBTI ne’e hakarak defende sira katak ema hotu kriasaun Maromak nian no laiha ai-moruk ida mak atu kura.

Partisipa iha semináriu ne’e mak hanesan  joven sira hosi ICF-TL,  estudante sira hosi universidade sira iha Dili laran no mós komunidade balun.

Jornalista : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here