Tempu serka sanitária iha Covalima. Imajen TATOLI/Eugénio Pereira

COVALIMA, 27 fevereiru 2021 (TATOLI)- Autoridade sivíl no seguransa iha Munisípiu Covalima  koordena ho Sala Situasaun Sentru Integradu Jestaun Krize (SS-CIGC) deside ona,  hahú sábadu ne’e, “lockdown” totál movimentu abitante no atividade sira iha Covalima to’o suku no aldeia sira.

Komandante PNTL Covalima, Superintendente António de Sá. Imajen Tatoli/Eugénio Pereira

Serka sanitaria alerta trés ka “lockdown” totál ne’e hodi evita transmisaun peste letál COVID-19 ne’ebé hada’et ona iha komunidade nia leet.

Komandante PNTL Covalima, Superintendente António de Sá informa desizaun  “lockdown” ka serka sanitaria alerta trés ba abitante Covalima hotu kedas.

Notísia Relevante : EKSES-Covalima preokupa ho situasaun atuál iha Fatumean

Munisípiu Covalima ho totál populasaun  65,301 kompostu hosi mane 32,968 no feto 32,33 (estatístika populasaun Covalima 2015), ne’ebé horik iha postu administrativu hitu maka hanesan Postu Administrativu  Fatululic, Fatumean, Forohem, Suai, Maukatar, Tilomar no Zumalai ho suku 30.

Covalima lokalizadu iha zona osidentál besik fronteira ho Indonézia ho área ida luan 1.226 km² presiza asegura seguransa maka’as, tanba abitante na’in-ualu (8) maka pozitivu COVID-19.

Atu asegura di’ak liután sentidu serka sanitaria alerta trés ne’e, Komandu PNTL Covalima hetan apoiu kolokasaun Forsa Unidade Territoriál PNTL no F-FDTL hamutuk 150 hosi reforsa seguransa iha liña fronteira terrestre no tasi nian.

“Fatin hotu ami blokeia para ita-nia komunidade hela iha idak-idak nia uma no labele sai halo vizita ba malu,” Superintendente António de Sá informa ba jornalista iha Aldeia Onu-laran, Suku Maudemu, Postu Administrativu Tilomar, Covalima.

Notísia Relevante : Na’in-rua ne’ebé evakua hosi Salele, ida pozitivu COVID-19

António esplika, serka sanitaria trés ne’e la’ós atu hamta’uk povu, maibé husu povu atu tuur hakmatek iha uma hodi evita propagasaun peste letál COVID-19.

“Ami husu favór ba ita nia povu sira atu tuur hakmatek iha idak-idak nia fatin, lalika la’o ba mai lai, fó tempu atu ekipa saúde ho ekipa konjunta Unidade Territoriál CIGC-SS, Munisípiu Covalima, buka tuir kontaktu sira hotu, no foti tan amostra hodi bele halo teste para bele luta hasoru COVID-19 ne’e,” António de Sá hateten.

Daudaun  ne’e iha Fatumean no Salele transmisaun lokál peste letál COVID-19 iha ona, tanba ne’e husu povu matan moris neon-na’in, prátika nafatin medida uza máskara, fase liman beibeik ho sabaun ka dezinfetante ruma. Tanba bainhira sira kumprimenta malu, la presiza ka’er-liman, bensa-liman, rei-malu ka hako’ak-malu, evita halibur malu barak no hamriik ka tuur dook hosi ema seluk, mínimu metru ida ho balun.

Ba abitante sira ne’ebé la kumpre regra, PNTL sei foti asaun tuir lei hodi ema hotu- hotu kumpre implementasaun serka sanitaria iha Covalima.

Observasaun Agência Tatoli nian iha terrenu nota, membru PNTL no F-FDTL halo operasaun másimu durante oras 24 hodi asegura movimentu iha liña fronteira to’o kapitál Covalima.

Akompaña servisu médiku rekolla amostra

Adjuntu Koordenadór Estadu Maiór SS-CIGC, Tenente Koronél, João da Costa Esteves, hamutuk ho Komandante António de Sá, tun direita ba Aldeia Onu-Laran, Suku Maudemu-Tilomar hodi akompaña  ekipa konjunta hosi vijilánsia epidemiolojia nível nasionál, laboratóriu nasionál saúde ne’ebé integra iha Unidade Territoriál CIGC-SS, buka tuir ona abitante sira ne’ebé halo kontaktu  sidadaun mane ida ho inisiál MCA, tinan 42.

Kazu foun ida ne’e hamosu indikasaun katak transmisaun lokál iha agrupamentu ka cluster Klauhalek, nakda’et tutan, ka espalla ona to’o Aldeia Onu-laran, Suku Maudemu, Tilomar, no iha mós posibilidade nakda’et ka espalla ona iha Suai vila, ho fatin seluk tan iha Covalima nia-laran.

Ekipa mós rekolla amostra hosi funsionáriu públiku no seguransa sira iha servisu fatin Ministériu Agrikultura Covalima, tanba halo kontaktu ho pasiente pozitivu COVID-19.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here