Reprezentante WFP iha Timor-Leste, Daeng Liu, entrega simbolikamente smartphone ba Diretór Jerál Estatístika, Élias dos Santos, iha edifísiu DGE, Caicoli, sesta (26/02). Imajen/Mídia MF

DILI, 26 fevereiru 2021 (TATOLI)Ministériu Finansa (MF) liuhosi Dirasaun Jerál Estatístika (DGE, sigla portugés) hetan apoiu smartphone 38 hosi Programa Ai-han Mundiál (WFP, sigla inglés), hodi fasilita kolesaun dadus Índise Presu Konsumedór (IPK) hosi munisípiu 12 inklui Rejiaun Administrativa Espesiál Oé-cusse Ambeno (RAEOA).

Diretór Jerál Estatístika, Élias dos Santos Ferreira, hateten durante ne’e MF liuhosi DGE rekolla dadus uza surat-tahan hanesan bainhira halo entrevista iha merkadu no mós loja sira ne’ebé mak kona amostra.

“Maibé, agora ba oin ami sei halo treinamentu ba ami-nia ekipa sira iha munisípiu 12 inklui RAEOA, ho nune’e sira bele uza smartphone ne’e hodi halo entrevista,” Diretór Élias hateten liuhosi nota ne’ebé Agência TATOLI asesu, sesta ne’e.

Tuir Dirijente ne’e, objetivu uza smartphone atu fasilita ekipa halo kollesaun dadus IPK semanál hodi hasa’e kualidade dadus konsumidór ne’ebé nu’udar mós pasu foun ida atu halo kollesaun dadus ho meiu elektróniku.

Planu ba oin, sei konvida ekipa hosi munisípiu 12 inklui, maibé reprezenta de’it kada munisípiu na’in-rua.

“Iha munisípiu tolu mak lockdown hela, parese sei hahú iha fulan hirak tuir mai. Munisípiu ida sei hetan smartphone rua no restu ami sei fó ba ami-nia ekipa IPK nasionál atu nune’e sira bele halo monitorizasaun ba prosesu ho ninia lala’ok sira,” nia akresenta.

Nune’e, nia agradese WFP no iha esperansa sei kontinua fasilita pesoál tékniku WFP atu fó treinamentu ba ekipa iha munisípiu sira.

Iha fatin hanesan, Reprezentante WFP, Dageng Liu, orgullu tanba bele suporta DGE iha parte kollesaun dadus IPK hosi surat-tahan ba dijitál.

“Ami entrega smarthphone ba DGE no ami espera ida ne’e bele uza ba munisípiu sira hotu atu fasilita serbisu,” nia hatutan.

Tuir Responsável ne’e, apoiu ne’e hanesan faze kiik ida no inísiu kolaborasaun entre parte rua ne’e nu’udar parseiru.

“Espera bele suporta polítiku sira foti desisaun bazeia ba dadus estatístika sira,” nia espera.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here