Estudante-sira hosi SENAI Becora hala’o prátika hodi pinta edifísiu Palásiu Prezidente Nicolau Lobato Bairru-Pité, maiu 2017. Imajen/SENAI Becora.

DILI, 26 fevereiru 2021 (TATOLI) – Tinan ne’e, Serviço Nacional de Aprendizagem Industriál (SENAI) Becora, simu estudante foun 270.

Diretór SENAI Becora, Lourenço da Silva Gusmão, hateten hosi estudante 270 ne’e, sei koloka 200 iha sentru SENAI Becora no 70 sei koloka ba sentru Beaço, Munisípiu Viqueque.

Notísia Relevante:UE hatudu kompromisu apoia SEFOPE dezenvolve área formasaun profisionál

“Ita halo ona teste ba kandidatu-sira hamutuk 666 iha loron 24 fevereiru no rezultadu sei fó-sai ohin,” Lourenço da Silva Gusmão hateten ba jornalista Agência Tatoli iha SENAI Becora, sesta ne’e.

Estudante 200 ne’e sei koloka ba área 10 mak hanesan pedreiru, karpintaria, eletrisidade, kanalizasaun, soldadura, mekánika motór,  kustura, reparasaun AC, panifikasaun halo dosi no Informasaun Teknolojia (IT).

Alende ne’e, sentru Beaço Viqueque prepara ona vaga 70 ba estudante foun-sira, maibé kandidatu ne’ebé rejista ona hamutuk 200  no kandidatu-sira ne’e sei tuir teste iha loron 15 marsu 2021, atu prinxe área lima ba konstrusaun jerál-nian.

Serviço Nacional de Aprendizagem Industriál (SENAI) Becora estabelese iha 2001 no to’o ohin loron konsege produs ona ema na’in 4.117.

Hosi númeru ne’e pursentu 55 mak asesu ona kampu traballu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here