Imajen TATOLI/Arminda Fonseca.

DILI, 26 fevereiru 2021 (TATOLI)—Grupu Sosiedade Sivíl kompostu hosi Organizasaun Fitun Maubere (FM), Fundasaun ba Dezenvolvimentu Komunidade Timor-Leste (FDCTL) Timor-Leste Vitiver Network (TLVN) husu ba Ministériu Solidaridade Sosiál no Inkluzasaun (MSSI) tenke halo jestaun no kontrolu ba atividade funsionamentu karreta funeráriu.

Notísia Relevante: Administradór munisípiu sira tenke halo manutensaun ba karreta funeráriu

“Ministra Solidariedade Sosiál nu’udár dirijente másimu iha Ministériu Tutela hanesan Alta Maizisteira iha Ministériu atu hatudu seriedade responsabilidade no kapasidade hodi dirije no halo jestaun no kontrola atividade funsionamentu ba karreta funeráriu, ne’ebé liga ho MSSI nune’e bele fó garantia asisténsia sosiál ba sidadaun tomak iha teritóriu laran, hodi nune’e labele hamosu diskriminasaun no desakreditasaun hosi povu no ukun-nain sira,” Portavós Grupu Sosiedade Sivíl, Diretór Ezekutivu Fitun Maubere, Mau-Laca Leto Araújo, hanesan porta voz, hateten liuhosi konferénsia imprensa ne’ebé hala’o iha Kampung-Alor, Dili, sesta ne’e.

Nia hateten, grupu Sosiede sivíl husu MSSI tenke hatudu seriedade tanba sira lamenta tebes ho iresponsabilidade hodi kontrola no halo jestaun ba operasaun karreta funeráriu hodi tula mate-isin ka kadavel sira.

Nia hatutan, tanba realidade hatudu ona iha Munisípiu Ermera Postu Administrativu Gleno, ne’ebé pasiente sira bainhira hakotu iis ka lakon sira-nia vida iha mundu ne’e, laiha karreta funeráriu hodi halo transportasaun.

 “Tanba ne’e, iha família hosi mate isin ka kadavel, tenki obrigatoriamente ko’us ka lori de’it mate isin hosi Gleno la’o ain ba to’o Aldeia Maukale, Postu Administrativu Hatolia, Zona B. Tanba laiha karru funeráriu hodi halo transportasaun ba kadavel refere, Ba iha nia rezidénsia ne’e hanesan sidadaun ne’ebé laiha valór boot iha nasaun ne’e,” nia dehan.

Tanba, sira konsidera laiha duni responsabilidade no kapasidade hosi dirijente relevante sira liu-liu Ministériu Solidariedade Sosiál no Inkluzaun ne’ebé tuir loloos mak iha kbiit responsabilidade tuir kompeténsia tomak ne’ebé atribui ona hosi Governu liuhosi Konsellu Ministru ba Ministériu refere, hodi halo jestaun ba patrimóniu Estadu sira.

Iha fatin hanesan, Jestór Programa, Fundasaun ba dezenvolvimentu Komunidade Timor-Leste (FDCTL), Tonito Soares, hateten situasaun ne’ebé foin lalais akontese iha Munisípiu Ermera mate-isin ko’us de’it hosi Glenu ba to’o iha Hatolia Zona B, ne’e hatudu ona katak VIII Governu Kontituisionál ne’e, menus garansia seriedade halo kontrolu ba patrimóniu sira. 

“Ita-nia sidadaun sira-ne’e moris, ita presiza halo tratamentu ho dignu maibé sira mate ita la halo tratamentu ho dignu ba sira. Tanba ne’e, ba oin, presiza halo jestaun ba kontrolu atividade funsionamentu tomak ligadu ba MSSI,” nia hatutan.

Notísia Relevante: MSSI Prevee Rihun $200 Sosa Karreta Funeráriu Lima

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here