Lagoa Eraulu iha suku Eraulu, postu Administrativu Letefoho, munisípiu Ermera. Imajen/Natalino Costa

ERMERA, 26 fevereiru 2021 (TATOLI)–Sekretaria Estadu Kooperativa (SEKoop) iha ona planu ba oin atu tranforma lagoa Eraulu iha postu administrativu Letefoho, munisípiu Ermera sai fatin turizmu no kooperativa peska.

Sekretáriu Estadu Kooperativa, Elizário Ferreira, nota katak Eraulu hanesan lagoa ne’ebé iha poténsia boot ba turizmu, tanba ne’e ba oin SEKoop iha hanoin transforma sai fatin peska atubele atrai turizta rai-li’ur hodi fó rendimentu ba populasaun iha Letefoho.

“Estadu bele organiza ema no sosa fini ikan, nune’e SEKoop sei apoia ita-boot sira atu harii kooperativa peska,” Sekretáriu Estadu Elizário tenik iha ámbitu diálogu ho komunidade iha suku Goulolo, postu administrativu Letefoho, munisípiu Ermera, sesta ne’e.

Notísia relevante: PM orienta MTKI dezenvolve Lagoa Maubara no Eraulo sai sítiu turíztiku

Aleinde ne’e, lagoa ne’e boot tebes ne’ebé fó biban ba populasaun harii kooperativa peska.

Iha aspeitu ne’e, nia dehan, populasaun sira bele halibur de’it kada ema ho kapitál hamutuk $5 to’o $25 hodi harii kooperativa ba peska.

“Imi bele halo daudaun hodi hatudu modelu, kuandu ema komesa mai barak maka imi halo tan  green house halo didi’ak, hafoin tau netik kama no haris fatin inklui sentina, no asegura fatin ne’e moos, nune’e bainhira ema dukur karik bele ba toba,” nia fó hanoin.

Sekretáriu Estadu dehan, karik aban bainrua lagoa Eraulu dezenvolve ba kooperativa peska, maka komunidade Letefoho bele identifika ai-han lokál hodi oferese ba turizta bainhira vizita.

“Nune’e ema estranjeiru bele koñese ai-han. Ita labele fa’an sosis ka ayam potong iha ne’ebá,” nia hatutan.

Iha fatin hanesan, Xefe suku Goulolo, João de Deus, konsidera Governu presiza dezenvolve fatin turizmu iha Ermera.

“Ita-boot sira hatene iha Ermera iha fatin turíztiku barak, liu-liu iha postu administrativu Letefoho rasik iha suku Goulolo iha fatin turizmu bee mean ne’ebé nudar istória naran orijinál Ermera no Lagoa Eraulu iha suku Eraulu rasik inklui fatin turizmu iha suku seluk,” nia dehan.

Tanba ne’e, líder komunitáriu ne’e husu Governu tau atensaun atu dezenvolve fatin potensiál sira hodi bele fó reseita ba komunidade sira.

“Ha’u sente kontente ho presenza Sekretáriu Estadu Kooperativa, tanba iha biban ne’e bele hetan esplikasaun ruma liga ho kooperativa rasik,” nia akresenta.

Hafoin rona esplikasaun hosi parte SEKoop, Abitante suku Goulolo, Joaquim Soares, interese atu envolve-an iha kooperativa peska.

“Ami apresia presenza SEKoop mai iha povu kiik nia le’et hodi esplika kona-ba kooperativa hodi ema hotu bele envolve hodi hadi’a moris,” nia tenik.

Postu administrativu Letefoho kompostu hosi aldeia 67 no suku 8, ho populasaun iha 28.225, ne’ebé maioria populasaun moris ho vida agrikultór hanesan kuda kafé, ai-farina, fehuk, talas, maibé la lori ba merkadu, uza ba de’it konsumu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here